Ҳуқуқни муҳофаза қилиш академияси талабаси БМТнинг коррупцияга қарши йўналишдаги халқаро ёшлар ташаббусида иштирок этишга таклиф этилди

Ўзбекистон Республикаси Ҳуқуқни муҳофаза қилиш академиясининг “Тергов фаолияти” бакалавриат таълим йўналиши 3-курс талабаси Машҳурa Мардонова халқаро танлов саралашидан муваффақиятли ўтиб, БМТнинг Гиёҳвандлик ва жиноятчилик бўйича бошқармаси (UNODC) томонидан коррупцияга қарши курашиш тўғрисидаги БМТ Конвенцияси иштирокчи давлатлар конференциясининг Ёшлар модели (Model UNCAC Youth COSP)га тайёргарлик доирасида ташкил этиладиган тайёрлов семинарида (Capacity-Building Workshop) иштирок этишга таклиф этилди. Мазкур Ёшлар модели конференциясини 2026 йил сентябрь ойида Қатар Давлатининг Доха шаҳрида ўтказиш режалаштирилган.

Тайёрлов семинари 2026 йил 25–26 март кунлари Австрия Республикасининг Вена шаҳрида жойлашган Вена халқаро марказида бўлиб ўтади. Ушбу тадбир GRACE глобал ташаббуси доирасида ташкил этилиб, коррупцияга қарши курашиш соҳасида ёш мутахассисларнинг касбий салоҳиятини ошириш, глобал антикоррупцион ёндашувни шакллантириш ҳамда халқаро ёшлар ҳамкорлигини мустаҳкамлашга қаратилган.

Семинар дастури доирасида коррупциянинг моҳияти ва унинг глобал оқибатларини чуқурроқ англаш, коррупция хавф-хатарлари ва ахлоқий чақириқларни таҳлил қилиш, замонавий технологиялар ҳамда сунъий интеллектнинг антикоррупцион механизмларни мустаҳкамлашдаги салоҳиятини ўрганиш, шунингдек COSP форматидаги халқаро музокараларда иштирок этиш кўникмаларини моделлаштириш орқали ривожлантириш назарда тутилган.

Танлов саралаши юқори рақобат шароитида ўтди: ташкилотчилар томонидан 130 дан ортиқ мамлакатдан келиб тушган 2 300 дан зиёд ариза кўриб чиқилди. Кўп босқичли баҳолаш натижаларига кўра, Машҳурa Мардонова финалчилар сафидан жой олди ва режалаштирилган икки тайёрлов семинарининг биринчисида иштирок этишга таклиф этилди.

Ушбу халқаро тадбирда Ўзбекистон вакили иштирок этаётгани мамлакат ёшларининг коррупцияга қарши курашиш бўйича глобал жараёнларга қизиқиши ва фаол иштирокини, шунингдек халқаро ҳамкорликни кенгайтириш йўлидаги интилишини тасдиқлайди.