Ҳуқуқни муҳофаза қилиш академиясига кириш истагида бўлган фуқаролар учун “PreAcademy” тайёрлов курслари ишга тушмоқда

Академияга ўқишга киришни режалаштираётган шахсларни йилдан йилга такомиллашиб бораётган кириш имтиҳонларига тайёрлаш учун “PreAcademy” ихтисослаштирилган тайёрлов курслари ишга тушишини маълум қиламиз. Ўқув курслари жорий йилнинг 2 мартидан бошлаб ўз ишини бошлайди. 

Ушбу Тайёрлов курслари номзодларни нафақат Ҳуқуқни муҳофаза қилиш академиясига, балки бошқа ҳуқуқни муҳофаза қилувчи органларининг ихтисослаштирилган олий таълим муассасаларига кириш имтиҳонларига сифатли ва ҳар томонлама тайёрлашга қаратилган.

“PreAcademy” курсларининг ўқув режаси ҳуқуқни муҳофаза қилувчи органлар хизматига қабул қилинувчи номзодларга қўйиладиган замонавий талабларни инобатга олган ҳолда ишлаб чиқилган бўлиб, кириш имтиҳонларига киритилган барча фанларни қамраб олади. Тўлиқ дастур давлат ва ҳуқуқ асослари, психология, академик ёзув, она тили ва адабиёт, математика ва чет тили каби фанларни ўз ичига олади.

Дастлабки ўқув курслари интенсив уч ойлик тайёргарликка мўлжалланган бўлиб, қуйидаги учта таянч фан бўйича кириш имтиҳонларига тайёрлашга асосланади:

 1. Давлат ва ҳуқуқ асослари – конституциявий ҳуқуқ, давлат ҳокимияти фаолияти механизмлари ҳамда миллий ҳуқуқий тизим асослари ҳақида чуқур тушунчани шакллантириш.

2. Психологик тайёргарлик – ҳуқуқни муҳофаза қилувчи орган ходими учун зарур бўлган стрессга чидамлилик, таҳлилий фикрлаш, мулоқот кўникмалари ҳамда маънавий-иродавий хислатларни ривожлантириш.

3. Академик ёзув – тест синовлари жараёнида керак бўлган ёзув кўникмалар ҳамда келгуси ўқиш пайтида зарур бўлган скиллар.

Номзодларга қуйидаги форматларда ўқиш танлов имконияти тақдим этилади:

Анъанавий (офлайн) шаклда – бевосита Академия базасида ўтказилади.  

Масофавий (онлайн) шаклда – замонавий рақамли таълим технологияларидан фойдаланган ҳолда ўтказилади.

 Машғулотлар Ҳуқуқни муҳофаза қилиш академиясининг юқори малакали мутахассислар ва амалиётчи экспертлари ҳамда тегишли соҳаларнинг мутахассислари томонидан илғор педагогик методикалар қўлланган ҳолда олиб борилади.

Рўйхатдан ўтиш ва алоқа

“PreAcademy” дастурининг амалиётга татбиқ этилиши Академиянинг ҳуқуқни муҳофаза қилувчи органлар учун янги авлод кадрларини танлаш ва тайёрлаш тизимини модернизация қилишда стратегик қадамидир.

Курснинг тузилиши, қабул шартлари ҳақида батафсил маълумот олиш ва расмий электрон рўйхатдан ўтиш Ҳуқуқни муҳофаза қилиш академиясининг махсус таълим платформасида қуйидаги ҳавола орқали амалга оширилади:

https://foundation.proacademy.uz/home