Академия ҳузуридаги тайёрлов курслари учун курс бошқарувчиси (менеджер) вазифасига танлов эълон қилинади (шартнома асосида вақтинчалик иш)

Ўзбекистон Республикаси Ҳуқуқни муҳофаза қилиш академияси ҳузуридаги абитуриентлар ва ҳуқуқни муҳофаза қилиш органларида фаолият юритишни режалаштираётган фуқаролар учун тайёрлов курслари ташкил этилмоқда. Айни пайтда ушбу курсларнинг ўқув жараёнини самарали бошқариш, тингловчилар сонини кўпайтириш ва умумий фаолиятни стратегик ривожлантириш мақсадида тажрибали мутахассисни жалб этиш зарурати мавжуд.

Танлов талабларига мувофиқ тақдим этилган ҳужжатлар кўриб чиқилиб, маъқулланган тақдирда, номзод билан Академия ўртасида икки томонлама фуқаролик-ҳуқуқий шартнома тузилади.

Мутахассис қуйидаги вазифаларни бажариши лозим:

тайёрлов курсларининг ўқув жараёнини бевосита бошқариш ва дарс сифатини назорат қилиш (мониторинг);

курсларнинг маркетингини юритиш, уларни оммалаштириш ва стратегик ривожлантириш чораларини кўриш;

ўқув дастурлари ва методикаларини ишлаб чиқишни ташкиллаштириш ҳамда доимий такомиллаштириб бориш;

Академия раҳбариятига курслар натижадорлиги бўйича таҳлилий маълумот ва ҳисоботларни мунтазам тақдим этиш;

Академиянинг бухгалтерия ва режа-молия бўлимига белгиланган тартибда молиявий ҳисоботларни тақдим этиш;

ўқув жараёни учун зарур бўлган техник ва хўжалик таъминоти масалаларини мувофиқлаштириш.

Номзодга қўйиладиган талаблар:

олий маълумотга эга бўлиши (таълимни бошқариш, менежмент ёки юриспруденция йўналишлари маъқулланади);

таълим соҳасида ёки ўқув марказларини бошқаришда амалий иш тажрибасига эга бўлиши;

маркетинг ва таълим хизматларини тарғиб қилиш кўникмаларига эга бўлиши;

ўзбек ва рус тилларини мукаммал билиши (инглиз тилини билиш устунлик беради).

Иш шартлари:

иш муддати 3 (уч) ой (келгусида зарурат туғилган тақдирда, номзод меҳнат шартномаси асосида ишга қабул қилиниши мумкин);

иш вақти ҳафтасига 5 иш куни, кунига 8 соат (40 соатлик иш ҳафтаси);

иш ҳақи: қатъий белгиланган ойлик маош + жалб қилинган тингловчилар сонига қараб бонус устамалар (сумма суҳбат давомида келишилади).

Номзодлар қуйидаги шахсий сифатларга эга бўлишлари лозим:

ташаббускорлик ва жамоа билан самарали ишлаш қобилияти;

мустақил фикрлаш ва ташкилотчилик кўникмалари;

масъулиятлилик ҳамда белгиланган вазифаларни ўз вақтида ва аниқ бажариш интизоми.

Танловга қуйидаги ҳужжатлар тақдим этилади:

номзоднинг шахсни тасдиқловчи ҳужжати (паспорт ёки ID-карта);

иш ва ўқиш фаолияти тўғрисида маълумотнома (резюме ёки объективка);

олий маълумот тўғрисидаги диплом ва унинг иловаси;

меҳнат дафтарчасидан кўчирма (мавжуд бўлган тақдирда, mygov.uz портали орқали);

СТИР тўғрисидаги маълумотнома.

Ҳужжатларни топшириш муддати: 2026 йил 5 март (шу куни ҳам қабул қилинади).

Манзил: Тошкент шаҳри, Юнусобод тумани, Рихсилий кўчаси, 9-уй (мўлжал: эски «Зенит» заводи).

Тел.: 71-202-04-96 ; 94-799-66-33.