Прокуратура органлари ходимлари учун ЮНЕСКО томонидан минтақавий тренинглар ўтказилди

ЮНЕСКОнинг Ўзбекистондаги ваколатхонаси томонидан Ўзбекистон Республикаси Ҳуқуқни муҳофаза қилиш академияси ва Швейцариянинг Ўзбекистондаги элчихонаси билан ҳамкорликда Хоразм вилояти ва Қорақалпоғистон Республикаси прокуратура органлари ходимлари учун “Сўз ва ифода эркинлиги ҳамда журналистлар хавфсизлигини таъминлаш” мавзусида қисқа муддатли тренинглар ўтказилди. 

Тренингда қайд этилган вилоят прокурорларининг прокуратура тергов тармоқлари, ИИВ органларида, ижтимоий ва иқтисодий соҳаларда қонунчилик ижроси устидан назорат бўлимлари масъул ходимлари, туман-шаҳар прокурорлари ёрдамчилари ва терговчилари иштирок этишди.

ЮНЕСКО ваколатхонаси томонидан лойиҳа доирасида жалб этилган халқаро эксперт, Мальта полицияси комиссари ёрдамчиси Кейт Арно, тадбир иштирокчиларига сўз ва ифода эркинлигини ҳимоя қилишнинг халқаро меъёрлари ва тамойиллари мазмун-моҳияти, шунингдек, прокуратура органлари ходимларининг жиноят ишлари тергови ва суд процесслари жараёнида оммавий ахборот воситалари вакиллари ҳуқуқ ва қонуний манфаатларини муҳофаза қилишдаги роли ҳақида батафсил тушунтириш берди.

Тренинг якунида иштирокчиларга халқаро андозадаги сертификатлар тантанали суратда топширилди.