Тергов сифати ва рақамли компетенцияларни оширишга қаратилган ўқув-амалий семинар ўтказилди

Ўзбекистон Республикаси Президенти раислигида жорий йил 27 январь куни ўтказилган видеоселектор йиғилишида тергов фаолияти сифатини тубдан яхшилаш, унинг холислиги ва шаффофлигини таъминлаш ҳамда ҳар бир жиноят иши бўйича қонуний қарор қабул қилинишига эришиш юзасидан аниқ вазифалар белгилаб берилган эди. Ушбу топшириқлар ижросини таъминлаш доирасида ҳуқуқни муҳофаза қилувчи органлар тизимида терговга оид ташкилий-амалий чора-тадбирлар изчил амалга оширилмоқда.

Мазкур вазифалардан келиб чиққан ҳолда Ҳуқуқни муҳофаза қилиш академияси ташаббуси билан Фарғона вилоятида прокуратура ва ички ишлар органлари терговчилари иштирокида ўқув-амалий семинар ташкил этилди.

Семинарнинг асосий мақсади тергов жараёнларини такомиллаштириш, иш юритишда замонавий ёндашувларни кенг жорий этиш, далилларни тўплаш ва баҳолаш сифатини ошириш, шунингдек терговчиларнинг касбий билим ва амалий кўникмаларини мустаҳкамлашдан иборат бўлди.

Тадбир давомида ахборот технологиялари ёрдамида содир этилаётган жиноятларни аниқлаш ва тергов қилиш масалаларига алоҳида эътибор қаратилди. Хусусан, рақамли изларни аниқлаш, уларни тўғри процессуал расмийлаштириш, электрон маълумотларни сақлаб қолиш ва қонуний тартибда мустаҳкамлаш, шунингдек тергов ҳаракатларини ўтказишда рақамли криминалистика имкониятларидан самарали фойдаланиш юзасидан амалий тушунтиришлар берилди.

Шу билан бирга, кибержиноятларни фош этишда тезкор маълумот алмашинувини таъминлаш, рақамли муҳитда далиллар занжирини бузмасдан тўплаш, электрон қурилмалар ва онлайн платформалар билан ишлашда эътибор қаратилиши лозим бўлган муҳим жиҳатлар муҳокама қилинди.

Семинар доирасида жиноятларни фош этиш ва олдини олишда очиқ манбалар таҳлили (OSINT)нинг ўрни ва аҳамиятига ҳам алоҳида урғу берилди. Очиқ манбалардан ахборот излаш, саралаш, таҳлил қилиш, уни тергов тусмоллари билан боғлаш ҳамда иш учун аҳамиятли маълумотларни тўғри расмийлаштириш масалалари амалий мисоллар орқали ёритилди.

Машғулотлар интерактив форматларда — мунозара, кейс-таҳлил, амалий мисоллар ва савол-жавоб тарзида ташкил этилди. Бу эса иштирокчиларнинг назарий билимларини мустаҳкамлаш, амалий вазиятларда тезкор ва асосли қарор қабул қилиш кўникмаларини ривожлантириш ҳамда тажриба алмашиш имкониятини кенгайтиришга хизмат қилди.

Бундай ўқув-амалий семинарлар ҳудудларда мунтазам ташкил этилиб, тергов сифати ва самарадорлигини оширишга қаратилган илмий-амалий ёрдам кўрсатиш ҳамда ходимлар малакасини изчил ошириш чора-тадбирлари тизимли равишда давом эттирилади.