Ўзбекистон Республикаси Ҳуқуқни муҳофаза қилиш академиясида назария ва амалиёт интеграциясига асосланган дуал таълим тизими жорий этилган бўлиб, у таълим олувчиларда касбий компетенцияларни шакллантиришнинг самарали механизми сифатида фаолият юритмоқда.
Дуал таълим жараёнларининг ҳудудларда ташкил этилиши, талабаларнинг амалий тайёргарлик даражаси ҳамда улар учун яратилган шарт-шароитларни ўрганиш мақсадида Бош прокурор ўринбосари С.И.Самадов бошчилигида, Академия бошлиғининг биринчи ўринбосари Е.В.Коленко ва профессор-ўқитувчилар иштирокида ҳудудий прокуратура органлари ҳамда суриштирув ва тергов фаолияти амалга ошириладиган бўлинмаларда амалий ўрганиш ишлари олиб борилди.
Ўрганиш ишлари Тошкент шаҳрининг барча туманларида, шунингдек, Тошкент вилоятининг Паркент, Пискент, Бўстонлиқ, Чиноз, Ўртачирчиқ, Қибрай, Янгийўл ва Тошкент туманлари ҳамда Олмалиқ, Нурафшон ва Чирчиқ шаҳарларида амалга оширилди.
Ташрифлар давомида талабаларнинг процессуал фаолиятга жалб этилиши даражаси, тажрибали ходимлар томонидан амалга оширилаётган устозлик тизимининг самарадорлиги, шунингдек, Академия ва амалиёт базалари ўртасидаги ўзаро ҳамкорлик механизмлари атрофлича ўрганилди.
Жумладан, талабаларнинг фуқаролар мурожаатларини кўриб чиқиш, процессуал ҳужжатларни тайёрлаш ва таҳлил қилиш, ҳодиса жойини кўздан кечириш ҳамда бошқа процессуал ҳаракатларда иштирок этиши уларда мустаҳкам касбий кўникмаларни шакллантиришга ва мустақил хизмат фаолиятига тайёрликни оширишга хизмат қилаётгани таъкидланди.
Ўрганиш натижаларига кўра дуал таълим тизимини янада такомиллаштириш, амалий тайёргарлик сифатини ошириш ва ҳамкорлик механизмларини кучайтиришга қаратилган тегишли тавсиялар ишлаб чиқилди. Мазкур йўналишдаги ишлар изчил давом эттирилмоқда.