Глобал барқарор ривожланиш мақсадлари (БРМ) бўйича ҳаракатлар ва хабардорликни ошириш ҳафталиги доирасида Ўзбекистон Республикаси Ҳуқуқни муҳофаза қилиш академияси томонидан Tashkent ploggers жамоаси билан ҳамкорликда экологик плоггинг марафони ташкил этилди.
Мазкур экологик акция Tashkent ploggers жамоаси билан шерикликда уч йилдан буён изчил равишда ўтказиб келинмоқда ва у Академия талабалари, ходимлари ҳамда шаҳар жамоатчилигини экологик масъулият ва фаол фуқаролик позицияси атрофида бирлаштирувчи барқарор ташаббусга айланди.
Плоггинг йўналиши Юнусобод-9 ҳудудини, жумладан Қорақамиш канали бўйлаб барпо этилган янги сайр йўлагини қамраб олди. Иштирокчилар жисмоний фаолликни маиший чиқиндиларни йиғиш билан уйғунлаштириб, шаҳар муҳитини ободонлаштириш ва маҳалла аҳолисига амалий кўмак кўрсатдилар.
Тадбир доирасида иштирокчилар учун брифинг ўтказилди, зарур анжомлар тақдим этилди ҳамда йиғилган чиқиндилар сараланди. Якунда фаол иштирокчилар рағбатлантирилди ва умумий натижалар сарҳисоб қилинди.
Бундай ташаббуслар Академия томонидан барқарор ривожланиш тамойилларини таълим ва тарбиявий жараёнларга интеграция қилиш, экологик маданиятни шакллантириш ҳамда келажакдаги ҳуқуқни муҳофаза қилувчи мутахассисларда ижтимоий масъулиятни мустаҳкамлашга қаратилган изчил сиёсатнинг амалий ифодасидир.