Ўзбекистон Республикаси Ҳуқуқни муҳофаза қилиш академияси вакили миллий делегация таркибида 25–27 февраль кунлари Қозоғистон Республикасининг Олмаота шаҳрида ўтказилган «Пул изидан: молиявий тергов ва активларни қайтариш стратегиялари» мавзусидаги минтақавий форумда иштирок этди.
Форум Бирлашган Қироллик Ҳукумати ҳамда БМТнинг Гиёҳвандлик ва жиноятчилик бўйича бошқармаси томонидан ташкил этилди ҳамда минтақадаги ваколатли органлар ўртасида ҳамкорликни мустаҳкамлаш, эришилган натижаларни баҳолаш ва истиқболли йўналишларни белгилашга қаратилди.
Тадбирда Қозоғистон, Қирғизистон ва Ўзбекистон давлатларининг ҳуқуқни муҳофаза қилувчи органлари, молиявий разведка бўлинмалари, прокуратура ва суд органлари, шунингдек таълим муассасалари вакиллари иштирок этди.
Форум доирасида иштирокчилар молиявий терговни амалга ошириш, жиноий фаолиятдан олинган даромадларни легаллаштиришга қарши курашиш ва активларни қайтариш соҳасидаги миллий стратегия ва норматив-ҳуқуқий ҳужжатлар бўйича маълумот тақдим этди, трансчегаравий ҳамкорлик тажрибаси билан ўртоқлашди.
Академия вакили Ўзбекистон Республикасининг жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш миллий тизимини ривожлантириш стратегияси ҳамда ушбу соҳада фаолият юритаётган мутахассисларнинг касбий салоҳиятини ошириш тажрибасини тақдим этди.
Форум экспертлари «Пул изидан қувиб» тамойилини амалга ошириш бўйича илғор халқаро амалиётлар ва мавжуд муаммолар юзасидан маълумот берди.
Шунингдек, миллий тизимни ривожлантириш концепцияси бўйича SWOT-таҳлил ҳамда шартли сценарий асосида кўп босқичли молиявий терговни моделлаштириш бўйича амалий машғулотлар ўтказилди.
Форум якунлари бўйича қонунчиликни такомиллаштириш ва ҳуқуқни қўллаш амалиёти самарадорлигини оширишга қаратилган тавсиялар ишлаб чиқилди.