Барқарор ривожланиш мақсадлари (БРМ) бўйича Ҳаракат ва хабардорлик глобал ҳафталиги доирасида Ҳуқуқни муҳофаза қилиш академиясида “Барқарор ривожланиш (экологик барқарор амалиётлар)” мавзусида давра суҳбати ташкил этилди. Тадбирда АҚШ Элчихонасининг “Fulbright” дастури эксперти Ж.Чярамонте, Академия профессор-ўқитувчилари ҳамда талабалари иштирок этди.
Муҳокама давомида эксперт барқарор ривожланиш тушунчасининг замонавий аҳамияти, экологик барқарорлик тамойиллари ҳамда “яшил” (eco-friendly practices) амалиётларнинг жамият тараққиётидаги ўрни ҳақида фикр билдирди. Хусусан, ресурслардан оқилона фойдаланиш, чиқиндилар ҳажмини камайтириш, қайта ишлаш маданиятини шакллантириш, энергия самарадорлигини ошириш ва атроф-муҳитни муҳофаза қилишга қаратилган ташаббуслар муҳокама қилинди.
Муҳокама жараёнида талабалар барқарор ривожланишнинг ҳуқуқий жиҳатлари, экологик масъулиятни таъминлаш механизмлари ҳамда ҳуқуқни муҳофаза қилувчи органларнинг ушбу йўналишдаги ўрни юзасидан саволлар билан фаол иштирок этдилар. Шунингдек, барқарор ривожланиш мақсадларини амалга оширишда ёшларнинг ташаббускорлиги ва фуқаролик масъулияти муҳим аҳамиятга эга экани таъкидланди.
Тадбир интерактив руҳда ўтиб, талабаларнинг экологик маданиятини ошириш, уларни халқаро тажриба билан таништириш ҳамда барқарор ва масъулиятли фаолият юритиш кўникмаларини шакллантиришга хизмат қилди. Суҳбат якунида иштирокчилар барқарор ривожланиш ғояларини амалиётга жорий этиш юзасидан ўз таклиф ва мулоҳазаларини билдирдилар.