Жорий йилнинг 27 январь куни Ўзбекистон Республикаси Президенти раислигида ўтказилган видеоселектор йиғилишида берилган топшириқлар, жумладан тергов сифатини тубдан ошириш ва унинг шаффофлигини таъминлашга қаратилган вазифалар ижроси доирасида Ҳуқуқни муҳофаза қилиш академияси томонидан тегишли ташкилий-амалий чора-тадбирлар изчил амалга оширилмоқда.
Шу каби тадбирлардан бири сифатида Академия ходимлари томонидан Хоразм вилояти прокуратура ва ички ишлар органлари терговчилари учун ўқув-амалий семинар ташкил этилди. Семинарнинг асосий мақсади тергов фаолиятида қонунчилик талабларини тўғри ва самарали қўллашни таъминлаш, жиноят ишларини тергов қилишда замонавий ёндашувларни жорий этиш, тергов ҳаракатларининг сифати ва натижадорлигини ошириш, шунингдек тергов жараёнининг очиқлиги ва шаффофлигини мустаҳкамлашдан иборат бўлди.
Семинар давомида ахборот технологияларидан фойдаланган ҳолда содир этиладиган жиноятларни аниқлаш ва тергов қилиш масалаларига алоҳида эътибор қаратилди. Иштирокчиларга рақамли изларни аниқлаш, уларни тегишли процессуал тартибда расмийлаштириш, электрон маълумотларни сақлаш ва қонунда белгиланган тартибда мустаҳкамлаш, шунингдек тергов ҳаракатларини амалга оширишда рақамли криминалистика имкониятларидан самарали фойдаланиш бўйича амалий тушунтиришлар берилди.
Шу билан бирга, кибержиноятларни фош этишда тезкор ахборот алмашинувини таъминлаш, рақамли муҳитда далилларни уларнинг яхлитлиги ва сақланиш занжирига путур етказмаган ҳолда йиғиш, шунингдек электрон қурилмалар ва онлайн-платформалар билан ишлашда эътибор қаратилиши лозим бўлган муҳим жиҳатлар муҳокама қилинди.
Семинар якунида иштирокчилар ўзларининг амалий фаолиятида учраётган долзарб масалалар юзасидан фикр алмашдилар, мавжуд тажрибаларни муҳокама қилдилар. Таъкидланганидек, бундай форматдаги мулоқот ва ҳамкорлик тергов амалиётини янада такомиллаштиришга, ходимларнинг касбий тайёргарлигини оширишга ҳамда тергов органлари фаолиятида ягона самарали ёндашувларни шакллантиришга хизмат қилади.