Ўзбекистон Республикаси Президенти раислигида жорий йил 27 январь куни ўтказилган видеоселектор йиғилишида тергов сифатини тубдан ошириш ва унинг шаффофлигини таъминлаш бўйича белгиланган вазифалар ижросини таъминлаш мақсадида ҳуқуқни муҳофаза қилувчи органлар тизимида изчил ишлар амалга оширилмоқда.
Мазкур вазифалар доирасида Ўзбекистон Республикаси Ҳуқуқни муҳофаза қилиш академияси томонидан Наманган вилояти прокуратураси ҳамда вилоят ички ишлар органлари терговчилари учун тергов фаолияти сифатини оширишга қаратилган ўқув-амалий семинар ташкил этилди.
Семинар давомида ахборот технологиялари ёрдамида содир этилаётган жиноятларни тергов қилиш, жиноятларнинг рақамли изларини аниқлаш, тергов ҳаракатларини ўтказишда рақамли криминалистика имкониятларидан фойдаланиш, шунингдек кибержиноятларни фош этиш ва тергов қилишнинг долзарб масалалари муҳокама қилинди.
Шунингдек, кибержиноятларга қарши курашишда банк ҳисоб рақамларини жиноий мақсадларда тақдим этиш ва улардан фойдаланишга қарши жиноят-ҳуқуқий механизмлар юзасидан иштирокчиларга тушунтиришлар берилди.
Замонавий ахборот технологиялари ва глобал рақамлаштириш шароитида жиноятларни фош этишда очиқ манбалардан олинган маълумотлардан фойдаланиш тактикаси ва стратегиясига ҳам алоҳида эътибор қаратилди.
Ўқув-амалий семинар интерактив усуллар, мунозаралар ҳамда савол-жавоблар шаклида ташкил этилиб, иштирокчиларнинг назарий билимларини мустаҳкамлаш ва амалий кўникмаларини янада оширишга хизмат қилди.
Бундай тадбирлар ҳудудларда мунтазам равишда ташкил этилиб, тергов фаолияти сифатини оширишга қаратилган илмий-амалий ёндашувлар асосидаги методик ёрдам ва малака ошириш ишлари изчил давом эттирилади.