Ўзбекистон Республикаси Ҳуқуқни муҳофаза қилиш академиясида халқаро ҳамкорликни ривожлантириш ва илғор хорижий тажрибани таълим жараёнига жорий этишга алоҳида эътибор қаратилмоқда. Шу мақсадда Академияда хорижий экспертлар ва амалиётчи мутахассислар иштирокида мунтазам равишда ўқув машғулотлари ташкил этилмоқда.
Навбатдаги машғулот Грузия Бош прокуратураси масъул ходими Тимур Цинделиани иштирокида ўтказилди. У Академия бакалавриати талабаларига «Айбланувчи иштирокисиз ҳукм чиқариш бўйича Инсон ҳуқуқлари бўйича Европа Суди томонидан белгиланган Европа стандартлари ҳамда мазкур стандартларнинг Ўзбекистон Республикаси учун долзарблиги» мавзусида маъруза қилди.
Маъруза давомида айбланувчининг процессуал ҳуқуқларини ҳимоя қилиш, суд муҳокамасининг адолатли ва холис ўтишини таъминлаш, инсон ҳуқуқларини кафолатлашнинг халқаро механизмлари ҳамда Европада шаклланган суд амалиёти мисоллари атрофлича муҳокама қилинди.
Машғулот интерактив мулоқот шаклида ўтказилиб, талабалар халқаро ҳуқуқий стандартлар, инсон ҳуқуқларини таъминлаш механизмлари ва замонавий суд амалиётига оид муҳим билимларга эга бўлдилар.
Академияда халқаро экспертлар иштирокида ташкил этилаётган бундай машғулотлар талабаларнинг ҳуқуқий тафаккурини кенгайтириш, замонавий ҳуқуқий стандартларни чуқур англаш ва уларни келгусидаги касбий фаолиятда самарали қўллашга хизмат қилмоқда.