Ўзбекистон Республикаси Ҳуқуқни муҳофаза қилиш академиясида ҳар ҳафта ўтказиб келинаётган маърифат соати доирасида киберхавфсизликни таъминлаш ва замонавий кибертаҳдидларнинг олдини олиш масалаларига бағишланган тадбир ташкил этилди.
Тадбирда “Киберхавфсизлик маркази” ДУКнинг малакали мутахассиси “Киберхавфсизликнинг долзарб муаммолари ва уларни олдини олиш чоралари” мавзусида маъруза қилди.
Маъруза давомида рақамли муҳитдаги замонавий таҳдидлар, хусусан фишинг ҳужумларининг механизмлари ва фойдаланувчиларни алдашга қаратилган усуллар таҳлил қилинди. Шунингдек, зарарли дастурий таъминот (malware) турлари ҳамда уларнинг ахборот тизимларига таъсир кўрсатиш механизмлари ҳақида батафсил маълумот берилди.
Тингловчиларга маълумотларни ҳимоя қилишнинг амалий усуллари – мустаҳкам пароллардан фойдаланиш, икки босқичли аутентификацияни жорий этиш каби чоралар тушунтирилди. Шу билан бирга, ахборот маконида хавфсиз фаолият юритишга қаратилган кибергигиена қоидаларига алоҳида эътибор қаратилди.
Мазкур тадбир иштирокчиларнинг замонавий кибертаҳдидлар ҳақидаги хабардорлигини ошириш ҳамда рақамли технологиялардан хавфсиз фойдаланиш кўникмаларини шакллантиришга хизмат қилди.