Ўзбекистон Республикаси Ҳуқуқни муҳофаза қилиш академиясига Германиянинг Халқаро ҳуқуқий ҳамкорлик фонди (IRZ) директори Ш.Хюльшёрстер бошчилигидаги делегация ташриф буюрди.
Ташриф доирасида меҳмонлар Академия фаолияти, хусусан прокуратура ва тергов органлари ходимларини тайёрлаш, қайта тайёрлаш ва малакасини ошириш тизими билан яқиндан танишдилар.
Учрашув давомида ҳамкорликнинг келгусидаги истиқболлари, жумладан қўшма тадбирлар ва тренинг дастурларини кенгайтириш масалалари муҳокама қилинди. Томонлар ҳуқуқий таълимни ривожлантириш, шунингдек ҳуқуқ-тартибот ва суд-ҳуқуқ соҳалари учун кадрларнинг касбий тайёргарлигини такомиллаштиришга қаратилган ҳамкорликни янада мустаҳкамлашдан манфаатдор эканликларини таъкидладилар.
Шунингдек, ташриф доирасида меҳмонлар Академиянинг амалиётга йўналтирилган таълим инфратузилмаси билан танишиб, таълим жараёнида қўлланилаётган замонавий технологиялар ва илғор методикаларга алоҳида эътибор қаратдилар. Жумладан, юридик клиника, криминалистика полигони, рақамли криминалистика лабораторияси ҳамда суд жараёнларини имитация қилиш заллари фаолияти намойиш этилди. Амалиётга асосланган таълим ёндашувининг аҳамияти алоҳида қайд этилди.
Учрашув конструктив руҳда ўтиб, назария ва амалиёт уйғунлигига асосланган Академия фаолияти меҳмонларда катта қизиқиш уйғотди.