Ҳуқуқни муҳофаза қилиш академиясида талаба-ёшлар ўртасида “Жадидлар жасорати – миллатимиз фахри” ҳамда “Жадидлар: миллий ўзлик, истиқлол ва давлатчилик ғоялари” мавзуларида иншолар танловининг академия босқичи ўтказилди.
Танлов талаба-ёшларнинг тарихий меросга бўлган қизиқишини ошириш, ижтимоий-сиёсий тафаккурини ривожлантириш ҳамда жадидлар меросини чуқур англаш орқали миллий ғоя ва давлатчилик қадриятларини мустаҳкамлаш мақсадида ташкил этилди.
Мазкур ташаббус Ўзбекистон Республикаси Олий таълим, фан ва инновациялар вазирлиги ҳузуридаги Талаба ва ўқувчиларнинг ижтимоий фаоллигини ошириш маркази томонидан илгари сурилган бўлиб, танлов икки босқичда – академия ва республика босқичларида ўтказилиши режалаштирилган.
Танлов доирасида иштирокчилар томонидан тайёрланган иншолар мазмуннинг тўлиқ очиб берилганлиги, жадидлар меросининг маънавий-интеллектуал жиҳатдан таҳлили, имловий саводхонлик, услубий маҳорат, ватанпарварлик ғояларини илмий асосда ёритиш қобилияти ҳамда хулосаларнинг мантиқийлиги каби мезонлар асосида баҳоланди.
Якунларга кўра ғолиблар аниқланиб, танловнинг республика босқичида иштирок этиш учун тавсия этилди.