Ўзбекистон Республикаси Президентининг 2026 йил 5 январдаги ПҚ-1-сон ҳамда ПҚ-2-сон қарорлари ижросини таъминлаш мақсадида Академия бошлиғининг биринчи ўринбосари Е.Коленко бошчилигидаги ишчи гуруҳ Бектемир тумани прокуратураси ва ички ишлар органлари фаолиятини мувофиқлаштириш бўлинмалари ходимлари билан учрашув ўтказди.
Учрашувда “илмий хулоса – тавсия – натижа” тамойили асосида ҳуқуқбузарликларни барвақт олдини олиш ва ҳудудда криминоген вазиятни яхшилаш бўйича аниқ таклиф ва тавсиялар ишлаб чиқилди.
Президент Шавкат Мирзиёев раислигида жорий йил 27 январь куни ўтказилган видеоселектор йиғилишида белгиланган вазифалар ижросига алоҳида эътибор қаратилди. Жумладан, тергов сифатини ошириш, унинг шаффофлигини таъминлаш, шунингдек кибержиноятларга қарши курашиш тактикаси ва стратегиясини такомиллаштириш устувор йўналиш сифатида қайд этилди.
Шунингдек, терговчиларнинг касбий кўникмаларини ривожлантириш масалалари муҳокама қилиниб, ўқув машғулотларини тизимли ташкил этиш бўйича келишувларга эришилди.
Алоҳида равишда Академия талабаларининг дуал таълим асосида тергов, профилактика ва жамоат тартибини сақлаш хизматларида амалиёт ўташ тартиби талаблари белгилаб олинди.
Ишчи гуруҳ томонидан Бектемир туманининг бир қатор маҳаллалари, жумладан “Нурафшон” маҳалласида ўрганиш ишлари амалга оширилди. Илмий ёндашув асосида криминоген вазиятга таъсир этувчи омиллар, ҳуқуқбузарликларга сабаб бўлувчи шарт-шароитлар, профилактика ишларининг ҳолати ҳамда аҳолининг ижтимоий-маиший муаммолари таҳлил қилинди.
Ўрганишлар натижасида аниқланган камчиликлар бўйича амалий тавсиялар берилиб, профилактик тадбирларнинг самарадорлигини ошириш бўйича тушунтириш ишлари олиб борилди.
Академия томонидан ишлаб чиқилган таклиф ва тавсиялар умумлаштирилиб, криминоген вазиятни янада яхшилашга қаратилган йўл хариталарига киритиш учун масъул ташкилотларга тақдим этилди.
Маҳаллаларда хавфсиз муҳитни яратиш ва ҳуқуқбузарликларнинг олдини олиш тизими самарадорлигини оширишга қаратилган ўрганиш ишлари изчил давом эттирилмоқда.