Россия Федерацияси Ички ишлар вазирлигининг Нижегород академияси томонидан «Россия Федерацияси ва МДҲ иштирокчи давлатларида миллий хавфсизликни таъминлашда ички ишлар органлари фаолияти» мавзусида халқаро илмий-тадқиқот ишлари танлови ўтказилди.
Мазкур танловда Россия ИИВ таълим ва илмий муассасаларининг илмий-педагогик ходимлари, шунингдек МДҲ иштирокчи давлатлари ҳуқуқни муҳофаза қилувчи органлари вакиллари иштирок этди.
Танлов илмий ишланмаларнинг назарий ва методик даражасини ошириш, тадқиқот натижаларини оммалаштириш, илмий фаолликни рағбатлантириш ҳамда халқаро илмий ҳамкорликни мустаҳкамлашга қаратилди.
Танлов якунларига кўра, «Шахс, жамият ва давлат миллий хавфсизлигини ҳуқуқий таъминлаш» номинациясида Рақамли криминалистика илмий-тадқиқот институти бўлими бошлиғи, юридик фанлар доктори Людмила Юрьевна Югай томонидан тайёрланган «Жиноятларни очиш ва тергов қилишда биометрик идентификация усулларидан фойдаланиш» номли ўқув қўлланма III даражали диплом билан тақдирланди.
Бундай халқаро танловларда иштирок этиш ва юқори натижаларга эришиш Ўзбекистон Республикаси Ҳуқуқни муҳофаза қилиш академиясининг илмий-тадқиқот салоҳияти юқори даражада эканини тасдиқлайди, касбий ва илмий алоқаларни кенгайтиришга хизмат қилади ҳамда Академиянинг халқаро илмий-таълим маконидаги нуфузини янада мустаҳкамлайди.