Ҳуқуқни муҳофаза қилиш академиясида Ўзбекистон Миллий кутубхонасининг миллий ва хорижий электрон ахборот ресурслари базаларидан самарали фойдаланишга бағишланган семинар-тренинг ташкил этилди.
Тадбирга эксперт сифатида Ўзбекистон Миллий кутубхонаси ходими Х.Бойсунова таклиф этилди.
Семинар давомида иштирокчилар Миллий кутубхона томонидан тақдим этилаётган электрон ресурслар имкониятлари билан яқиндан танишдилар, шунингдек халқаро илмий маълумотлар базаларида ишлаш бўйича амалий кўникмаларга эга бўлдилар.
Хусусан, ProQuest платформаси орқали дунёдаги энг йирик тўлиқ матнли диссертациялар базасидан фойдаланиш имкониятлари, шунингдек CNKI (China National Knowledge Infrastructure) орқали Хитой илмий журналлари ва тадқиқот материалларига кириш имкониятлари кенг ёритилди.
Шунингдек, East View Information Services халқаро маълумотлар базаси орқали Россия ва бошқа мамлакатлар илмий нашрларидан фойдаланиш, мақолаларни юклаб олиш, нусха кўчириш ва электрон тарзда тарқатиш имкониятлари ҳақида атрофлича маълумот берилди.
Тадбирда Академия магистрантлари ва докторантлари иштирок этиб, ўзларини қизиқтирган саволларга мутахассисдан атрофлича жавоб олдилар.
Бундай семинар-тренинглар илмий тадқиқот ишлари сифатини ошириш, ахборот ресурсларидан самарали фойдаланиш кўникмаларини ривожлантириш ҳамда халқаро илмий маконга интеграциялашувни кучайтиришга хизмат қилади.