Ўзбекистон Республикаси Ҳуқуқни муҳофаза қилиш академиясида АҚШ Адлия вазирлигининг Хорижий прокурорларни тайёрлаш, қўллаб-қувватлаш ва ривожлантириш бўйича бошқармаси (OPDAT) юридик маслаҳатчиси Аарон Лукофф билан учрашув бўлиб ўтди.
Учрашув давомида хорижий экспертга Академия фаолияти, унинг илмий салоҳияти, таълим дастурлари, шунингдек прокурор-тергов кадрларини тайёрлаш, қайта тайёрлаш ва малакасини ошириш тизими ҳақида батафсил маълумот тақдим этилди.
Алоҳида эътибор америкалик экспертлар иштирокида ўқув модуллари ва таълим курсларини ишлаб чиқиш масалаларига қаратилди. Томонлар уларни Академиянинг “Proacademy” электрон таълим платформаси орқали амалга ошириш, таълим соҳасида ҳамкорлик бўйича қўшма “йўл харитаси”ни ишлаб чиқиш, шунингдек Марказий Осиё давлатлари ҳуқуқни муҳофаза қилувчи органлари вакиллари учун минтақавий ўқув курсларини ташкил этиш юзасидан келишиб олдилар.
Шунингдек, учрашув доирасида хорижий эксперт Ўзбекистон Республикасининг суд-ҳуқуқ тизими, ушбу соҳада амалга оширилаётган ислоҳотлар, тергов жараёнининг ўзига хос хусусиятлари ҳамда одил судловни амалга ошириш механизмлари билан таништирилди.
Учрашув конструктив ва ишбилармонлик руҳида ўтди ҳамда томонларнинг ўзаро ҳамкорликни янада ривожлантиришга бўлган манфаатдорлигини тасдиқлади.