Ўзбекистон Республикаси Ҳуқуқни муҳофаза қилиш академияси бошлиғининг биринчи ўринбосари, профессор Е.В.Коленко қонун устуворлиги ва тартиб ғоясини жамиятда илгари суриш концепциясини 2025–2030 йилларда амалга ошириш масалаларига бағишланган халқаро илмий семинарда онлайн форматда иштирок этди. Мазкур тадбир Қозоғистон Республикаси Бош прокуратураси ҳузуридаги Ҳуқуқни муҳофаза қилиш органлари академияси томонидан ташкил этилди ҳамда Остона шаҳрида гибрид шаклда ўтказилди.
Семинарда Қозоғистон, Ўзбекистон, Россия Федерацияси ва бошқа давлатлардан ҳуқуқни муҳофаза қилувчи органлар, илмий ва таълим муассасалари вакиллари иштирок этдилар.
Е.В.Коленко ўз маърузасида қонун устуворлиги ва тартиб ғоясини шакллантиришнинг стратегик аҳамиятини алоҳида таъкидлаб, уни жамиятда ҳуқуқий маданиятни юксалтириш, ҳуқуқбузарликларнинг олдини олиш самарадорлигини ошириш ҳамда ҳуқуқни муҳофаза қилувчи органлар фаолияти натижадорлигини таъминлашнинг муҳим омили сифатида қайд этди. Шунингдек, Ўзбекистон Республикасида амалга оширилаётган суд-ҳуқуқ ислоҳотларининг қонун устуворлигини мустаҳкамлаш, фуқароларнинг ҳуқуқий онгини ривожлантириш ва ҳуқуқни қўллаш амалиётига замонавий ёндашувларни жорий этишга қаратилганлигига алоҳида урғу берилди.
Семинар доирасида Қозоғистон Республикаси Адлия вазирлиги ҳузуридаги Қонунчилик ва ҳуқуқий ахборот институти, Россия Федерацияси Прокуратура университети, Россия Федерацияси Ички ишлар вазирлиги Волгоград академияси, Саратов давлат юридик академияси ҳамда бошқа нуфузли таълим муассасалари вакиллари ҳам маърузалар билан иштирок этдилар.
Мазкур семинар қонунчилик ва ҳуқуқ-тартиботни мустаҳкамлашга қаратилган замонавий ёндашувларни ишлаб чиқиш, илғор тажриба алмашиш ҳамда халқаро ҳамкорликни кенгайтириш учун самарали мулоқот майдони бўлиб хизмат қилди.