Ўзбекистон Республикаси Ҳуқуқни муҳофаза қилиш академиясида ёшлар билан ишлаш бўйича тизимли чора-тадбирлар доирасида “Раҳбар ва ёшлар учрашуви” рукнида Ўзбекистон Республикаси Бош прокурори ўринбосари, Академия бошлиғи в.б., III даражали давлат адлия маслаҳатчиси С.И.Самадов ҳамда талабалар билан учрашув ўтказилди.
Тадбир очиқ мулоқот шаклида ташкил этилди. Унда ҳуқуқни муҳофаза қилиш органлари учун бўлажак кадрларни тайёрлаш сифати, касбий компетенцияларни ривожлантириш ва ҳуқуқий онгни шакллантириш масалалари муҳокама қилинди.
Академияда жорий этилган дуал таълим тизимига алоҳида эътибор қаратилди. Ушбу тизим назарий билимлар билан амалий фаолиятни узвий уйғунлаштиришга хизмат қилиши таъкидланди. Шунингдек, ёшларни маънавий-ахлоқий тарбиялаш, китобхонлик маданиятини ривожлантириш, миллий қадриятлар, тарих ва ўз илдизларига ҳурмат руҳини шакллантириш масалаларига алоҳида урғу берилди.
Шу билан бирга, жисмоний тайёргарликни ривожлантириш, спортни оммалаштириш ва соғлом турмуш тарзини қарор топтириш ҳуқуқни муҳофаза қилиш органлари ходимларининг касбий шаклланишида муҳим омил экани таъкидланди.
Ўзбекистон Республикаси Президенти томонидан белгиланган устувор вазифалар доирасида ёшлар учун ҳар томонлама ривожланиш шароитларини яратиш, уларнинг салоҳиятини тўлиқ рўёбга чиқариш ҳамда қонун устуворлиги ва жамоат тартибини таъминлашда фаол иштирокини таъминлаш муҳимлиги қайд этилди.
Учрашув давомида талабалар ўзларини қизиқтирган саволлар билан мурожаат қилиш имкониятига эга бўлиб, уларга батафсил жавоблар берилди.
Раҳбар таъкидлаганидек, «Замонавий ҳуқуқни муҳофаза қилиш органлари ходими нафақат юқори касбий тайёргарликка эга бўлиши, балки маънан етук, жисмонан бақувват, кенг дунёқарашга эга, миллий қадриятларга чуқур ҳурмат билан қарайдиган ва адолат тамойилларига содиқ бўлган шахс бўлиши лозим. Ана шундай кадрларгина қонун ва жамиятга самарали хизмат қила олади».
Тадбирнинг кульминацияси сифатида ўқиш, илмий ва жамоат фаолиятида юқори натижаларга эришган талабаларни тақдирлаш маросими бўлиб ўтди. Жумладан, юқори билимга интилиш, намунавий хулқ-атвор ва эришилган ютуқлари учун, шунингдек Ўзбекистон Республикаси Президенти давлат стипендияси ҳамда Ислом Каримов номидаги давлат стипендияси соҳиби бўлган талабалар қимматбаҳо совғалар ва ташаккурномалар билан тақдирланди. Шунингдек, БМТнинг Гиёҳвандлик ва жиноятчилик бўйича бошқармаси (UNODC) томонидан Model UNCAC Youth COSP ташаббуси доирасида Вена халқаро марказида ташкил этилган Capacity-Building Workshop халқаро ўқув семинарида иштирок этиш учун грантни қўлга киритган талаба ҳам алоҳида эътироф этилди.
Шу билан бирга, «Наврўзни улуғлаш – инсонни улуғлашдир» шиори остида ўтказилган тадбир доирасида ҳарбий-спорт эстафетаси, шу жумладан камондан ўқ отиш, стол тенниси ва армрестлинг бўйича мусобақалар ғолиб ва совриндорлари ҳам тақдирланди. Иштирокчилар юқори жисмоний тайёргарлик, мақсадга интилиш ва ғалабага бўлган иродани намоён этиб, Академияда ёшларни ҳар томонлама ривожлантириш ва соғлом турмуш тарзини тарғиб қилиш бўйича амалга оширилаётган ишлар самарадорлигини яна бир бор тасдиқладилар.
Мазкур учрашув ёшлар билан ишлашнинг тизимли механизмларини ривожлантириш, улар билан самарали мулоқотни мустаҳкамлаш ҳамда қонунга хизмат қилишга бўлган барқарор мотивацияни шакллантиришга хизмат қилди.
Учрашув якунида Ўзбекистон Республикаси Ҳуқуқни муҳофаза қилиш академияси раҳбарияти Юнусобод ва Мирзо Улуғбек туманлари прокуратура ва ички ишлар органларида дуал таълим тизимининг амалга оширилиши билан танишди.
Чиқишлар давомида амалий тайёргарликни ташкил этиш шарт-шароитлари, талабаларнинг тергов ва профилактика фаолиятидаги иштироки, шунингдек назарий билимларни амалиёт билан уйғунлаштириш даражаси ўрганилди. Шу билан бирга, талабаларни тажрибали ходимларга бириктириш, устозлик институти самарадорлиги ҳамда ҳақиқий хизмат муҳитида касбий кўникмаларни шакллантириш масалаларига алоҳида эътибор қаратилди.