Коррупцияга қарши маданиятни шакллантиришга қаратилган вазифалар ижроси доирасида Ўзбекистон Республикаси Ҳуқуқни муҳофаза қилиш академияси вакиллари томонидан «Suv xo‘jaligida bozor mexanizmlarini joriy qilish» давлат муассасасида тарғибот тадбири ташкил этилди.
Тадбирнинг асосий мақсади ходимларнинг ҳуқуқий саводхонлигини ошириш, коррупцияга нисбатан барқарор муросасиз муносабатни шакллантириш, шунингдек коррупцияга қарши курашиш соҳасида давлат сиёсатининг устувор йўналишларини кенг тушунтиришдан иборат бўлди.
Тадбир давомида Академия вакили томонидан маъруза қилиниб, унда коррупциянинг олдини олишга қаратилган замонавий ёндашувлар, унинг келиб чиқиш омиллари таҳлил қилинди, шунингдек коррупциявий ҳолатларнинг жамият ва давлатнинг барқарор ривожланишига салбий таъсири ёритилди.
Алоҳида эътибор мамлакатимизда коррупцияга қарши курашиш соҳасида амалга оширилаётган ислоҳотларга, давлат органлари фаолиятининг очиқлиги ва шаффофлигини таъминлаш масалаларига, рақамли технологияларни жорий этишга ҳамда жамоатчилик назорати механизмларини кенгайтиришга қаратилди.
Очиқ мулоқот шаклида ўтган тадбирда иштирокчилар ўзларини қизиқтирган саволларга жавоб олдилар, ҳалоллик тамойилларига риоя қилиш, манфаатлар тўқнашувининг олдини олиш ва коррупцияга қарши маданиятни шакллантиришнинг амалий жиҳатларини муҳокама қилдилар. Мазкур тадбир профессионал муҳитда ҳуқуқий онгни юксалтириш ва коррупцияга нисбатан муросасиз муносабатни мустаҳкамлашга хизмат қилди.