Ўзбекистон Республикаси Президентининг 2026 йил 5 январдаги ПҚ-1-сон қарори, шунингдек жорий йил 27 январь куни ўтказилган видеоселектор йиғилишида берилган топшириқлар ижроси доирасида Ўзбекистон Республикаси Ҳуқуқни муҳофаза қилиш академияси томонидан сайёр ўқув машғулотлари ташкил этилмоқда. Мазкур машғулотлар Тошкент шаҳрининг Академияга бириктирилган Яшнобод, Шайхонтоҳур ва Бектемир туманларидаги 136 та маҳалла фуқаролар йиғини раисларининг замонавий бошқарув кўникмаларини ривожлантириш, ҳудудларда ижтимоий барқарорликни мустаҳкамлаш ҳамда рақамли трансформация жараёнларини жадаллаштиришга қаратилган.
Ушбу йўналишдаги ўқув машғулотлари «маҳалла еттилиги»нинг бошқа аъзолари – ҳоким ёрдамчилари, профилактика инспекторлари, ёшлар етакчилари ва хотин-қизлар фаоллари учун ҳам алоҳида дастур асосида ташкил этилган бўлиб, уларда 600 нафардан ортиқ ходим иштирок этмоқда. Шу тариқа, маҳаллаларда манзилли ишлаш, муаммоларни эрта аниқлаш ва уларнинг олдини олишга қаратилган кўп тармоқли ҳамкорликни янада мустаҳкамлаш мақсад қилинган.
Жами 10 ҳафтага мўлжалланган мазкур ўқув машғулотлари ва семинар-тренинглар жорий йилнинг апрель–июнь ойлари давомида ўтказилади. Машғулотлар дастурига «Жиноятларни барвақт олдини олиш», «Ижтимоий профилактика», «Наркожиноятларга қарши курашиш», «Маъмурий-юрисдикцион фаолият», «Амалий психология», «Муаммоли социология», «Рақамли саводхонлик», «Кибермаданиятни шакллантириш» каби модуллар киритилган.
Ўқув жараёнида асосий эътибор маҳалла раислари ва бошқа иштирокчиларнинг касбий компетенцияларини мустаҳкамлашга, раҳбарлик қобилиятини ривожлантиришга, тезкор ва асосланган қарор қабул қилиш кўникмаларини шакллантиришга, рақамли муҳитда самарали ишлаш ҳамда аҳолига сифатли хизмат кўрсатиш маданиятини юксалтиришга қаратилмоқда. Шу билан бирга, иштирокчиларга замонавий ахборот тизимлари ва платформалардан фойдаланиш, кибермаданиятни ривожлантириш, киберхавфлардан ҳимояланиш, ижтимоий профилактика механизмларини амалиётда қўллаш, аҳоли билан манзилли ишлаш ва муаммоларни барвақт бартараф этиш бўйича амалий тавсиялар берилмоқда.
Ўқув машғулотлари якунида иштирокчиларнинг билим ва кўникмалари якуний назорат асосида баҳоланади. Дастурни муваффақиятли тамомлаган тингловчиларга Академия томонидан малака оширганлик тўғрисида сертификатлар топширилиши режалаштирилган.
Мазкур комплекс ўқув машғулотлари «маҳалла еттилиги» аъзоларининг ҳудудларда самарали бошқарувни йўлга қўйиш, вазифаларни сифатли бажариш, аҳоли билан манзилли ва натижадор ишлаш, шунингдек рақамли жамият талабларига мослашиш жараёнларини жадаллаштиришда муҳим аҳамият касб этади. Академия томонидан маҳаллаларда хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини оширишга қаратилган амалий ишлар изчил давом эттирилмоқда.