Маҳаллаларда хавфсиз муҳитни таъминлаш ва ҳуқуқбузарликларни барвақт олдини олиш самарадорлигини оширишга қаратилган вазифалар ижроси доирасида Ўзбекистон Республикаси Ҳуқуқни муҳофаза қилиш академияси томонидан Тошкент шаҳрининг Яшнобод, Шайхонтоҳур ва Бектемир туманлари маҳаллалари профилактика инспекторлари учун сайёр ўқув машғулотлари ташкил этилди.
Ушбу ўқув жараёнларида 270 нафардан ортиқ профилактика инспекторлари иштирок этмоқда. Машғулотларнинг асосий мақсади – замонавий бошқарув кўникмаларини ривожлантириш, ҳудудларда ижтимоий барқарорликни таъминлаш ва рақамли трансформация жараёнларини жадаллаштиришдан иборат.
Ўқув дастури модулли асосда шакллантирилган бўлиб, жиноятларни барвақт олдини олиш, ижтимоий профилактика, наркожиноятларга қарши курашиш, маъмурий-юрисдикцион фаолият, амалий психология, муаммоли социология, рақамли саводхонлик ва кибермаданиятни шакллантириш каби йўналишларни қамраб олади.
Машғулотларда хавф-хатарларни баҳолаш, жиноят ўчоқларини аниқлаш ва криминоген вазиятни прогнозлаш, ҳуқуқбузарликларни барвақт олдини олиш тактикаси, профилактик ҳисобда турган шахслар билан ишлаш, уларни ижтимоий ҳаётга қайтариш ва жамоатчилик назоратини йўлга қўйиш масалаларига алоҳида эътибор қаратилмоқда.
Шунингдек, ҳуқуқбузарликларга оид хабарлар билан ишлашнинг замонавий ёндашувлари, ахборот тизимлари ва рақамли платформалардан самарали фойдаланиш, киберхавфлардан ҳимояланиш бўйича амалий билимлар берилади.
Машғулотларда профилактика инспекторларининг касбий компетенцияларини мустаҳкамлаш, лидерлик фазилатлари, тезкор қарор қабул қилиш, рақамли муҳитда самарали ишлаш ва аҳоли билан ишлаш сифатини оширишга алоҳида урғу берилмоқда.
Ўқув жараёни якунида иштирокчиларнинг билим ва кўникмалари баҳоланиб, машғулотларни муваффақиятли тамомлаганларга малака оширганлиги тўғрисида сертификатлар берилиши режалаштирилган.
Мазкур тадбирлар профилактика инспекторларининг фаолияти самарадорлигини ошириш, замонавий бошқарув ёндашувларини жорий этиш ва рақамли жамиятга мослашув жараёнларини жадаллаштиришга хизмат қилмоқда.
Академия томонидан маҳаллаларда хавфсиз муҳитни таъминлаш ва ҳуқуқбузарликларнинг олдини олиш тизимини такомиллаштиришга қаратилган ишлар изчил давом эттирилмоқда.