Ички ишлар вазирлиги ҳузуридаги Тергов департаменти ҳудудий бошқармалари ҳамда туман-шаҳар тергов бўлимлари раҳбарлари Ўзбекистон Республикаси Ҳуқуқни муҳофаза қилиш академиясида тергов қилиш соҳасида кадрларни тайёрлаш ва қайта тайёрлашнинг замонавий тизими билан таништирилди.
Тадбир давомида иштирокчиларга тергов кадрларини тайёрлашнинг илмий-амалий ёндашувлари, малака оширишнинг замонавий механизмлари, ўқув-услубий таъминот, шунингдек, янги авлод ўқув модуллари мазмуни ҳақида батафсил маълумотлар тақдим этилди. Академия томонидан тергов-суриштирув ходимларининг касбий компетенцияларини тизимли равишда оширишга қаратилган ишлар алоҳида қайд этилди.
Тергов соҳасида малакали кадрларни тайёрлашни сифат жиҳатидан янги босқичга олиб чиқиш мақсадида Академияда жорий этилган замонавий таълим шакллари, илғор педагогик ва ахборот технологиялари асосида назарий билимларни ҳуқуқни қўллаш амалиёти билан узвий боғлашга қаратилган ёндашувлар, жумладан масофавий таълим имкониятлари кенг ёритилди.
Тадбир доирасида иштирокчилар Академияда ташкил этилган тергов полигонлари, криминалистика лабораториялари, Рақамли криминалистика илмий-тадқиқот институти, шунингдек, ўқитиш жараёнини таъминловчи замонавий моддий-техник база ва ахборот ресурслари билан яқиндан танишдилар.
Музокаралар жараёнида тергов самарадорлигини ошириш, кадрларни қайта тайёрлаш ва малакасини ошириш тизимини янада такомиллаштириш, шунингдек, Академия ва Тергов департаменти ўртасидаги ҳамкорликни кенгайтириш ва уни амалий ҳамда тизимли механизмлар асосида ривожлантириш масалалари муҳокама қилинди.
Томонлар томонидан талаб асосида ўқув модулларини ишлаб чиқиш, амалиётга йўналтирилган қўшма таълим дастурларини жорий этиш ҳамда кадрлар тайёрлаш тизимини янада мувофиқлаштириш бўйича қатор таклифлар илгари сурилди.
Тадбир якунида иштирокчилар ўзларини қизиқтирган саволларга жавоб олдилар.