Тадбиркор доиралар вакиллари иштирокида солиқ сиёсатидаги асосий ўзгаришлар тўғрисида семинар ўтказилди

Бош прокуратура Академиясида 2019 йил 12 январь куни солиқ сиёсатидаги ўзгаришлар, соддалаштирилган ёки умумбелгиланган тартибда ҚҚСни ҳисоблаш ва тўлашга ўтишда юзага келаётган масалаларга бағишланган семинар ўтказилди.

Тадбирда икки юздан ортиқ тадбиркорлик субъектлари, ассоциациялар, шунингдек, прокуратура ва давлат солиқ хизмати вакиллари иштирок этди.

Тадбирда Давлат солиқ қўмитаси раиси ўринбосари А.Файзибаев, Молия вазирлиги бошқарма бошлиғи ўринбосари Э.Гадоев, Бош прокуратура Академияси Маркази бошлиғи Б.Исмаилов сўзга чиқди.

Тадбир давомида маърузачилар томонидан 2019 йилга мўлжалланган солиқ сиёсати асосий йўналишларининг мазмун-моҳияти, солиқлардаги асосий ўзгаришлар ва уларни ҳисоблашнинг механизмлари батафсил тушунтириб берилди, шунингдек, тадбиркорлик субъектлари учун солиқ сиёсатидаги ўзгаришларни содда шаклда тушунтириб берадиган материаллар тарқатилди.

Ўтказилган тадбирда тадбиркорлик субъектлари вакиллари фаол иштирок этишди, улар ўзларини қизиқтирган саволларга батафсил жавоб олдилар, шунингдек соддалаштирилган ёки умумбелгиланган тартибда ҚҚСни ҳисоблаш ва тўлашга ўтишдаги муаммоларни бартараф этиш бўйича таклифлар киритилди.