Ўзбекистон Республикаси Ҳуқуқни муҳофаза қилиш академиясида анъанавий Маърифат соати доирасида Ўзбекистон Журналистика ва оммавий коммуникациялар университети ректори Ш.Т.Қудратхўжа билан учрашув бўлиб ўтди.
Тадбирда Академия раҳбарияти, профессор-ўқитувчилар, магистратура тингловчилари иштирок этди. Учрашув давомида мамлакатимизда амалга оширилаётган ислоҳотлар, ахборот маконининг трансформацияси, журналистиканинг замонавий вазифалари, шунингдек таълим ва илм-фан соҳасидаги устувор йўналишлар хусусида фикр алмашилди.
Меҳмон томонидан глобал ахборот муҳитида рақобатбардошликни таъминлаш, жамоатчилик билан самарали коммуникацияни йўлга қўйиш, ахборотнинг ишончлилиги ва тезкорлигини таъминлаш, шунингдек, фейк хабарларга қарши курашиш масалалари алоҳида таъкидланди.
Учрашув интерактив руҳда ўтиб, иштирокчилар томонидан берилган саволларга атрофлича жавоб берилди. Айниқса, ёшларнинг медиа саводхонлигини ошириш, ахборот хавфсизлигини таъминлаш ва рақамли даврда масъулиятли ахборот истеъмолини шакллантириш масалалари қизғин муҳокама қилинди.