Ҳуқуқни муҳофаза қилиш академияси ишчи гуруҳи Тошкент вилоятида маҳаллаларда хавфсиз муҳитни таъминлаш ҳамда жиноятчиликнинг барвақт профилактикасини кучайтириш масалаларига бағишланган Республика идоралараро мувофиқлаштириш штаби йиғилишида иштирок этди.
Ўзбекистон Республикаси Президентининг 2026 йил 5 январдаги ПҚ–1 ва ПҚ–2-сон қарорлари ижросини таъминлаш доирасида Академия томонидан «илмий хулоса – тавсия – натижа» тамойили асосида маҳаллаларда криминоген вазиятни таҳлил қилиш, ҳуқуқбузарликлар сабаб ва омилларини ўрганиш ҳамда манзилли профилактика чораларини ишлаб чиқишга қаратилган ишлар тизимли равишда амалга оширилмоқда.
Йиғилиш давомида Академия ишчи гуруҳи томонидан Тошкент вилоятининг Ангрен ва Олмалиқ шаҳарларида олиб борилган ўрганишлар натижалари тақдим этилди. Жумладан, мазкур ҳудудларда жиноятчилик ҳолати, унинг сабаб ва шарт-шароитлари, профилактик ҳисобдаги шахслар билан ишлаш амалиёти ҳамда ҳуқуқбузарликларнинг олдини олиш механизмлари комплекс таҳлил қилинди.
Шунингдек, Ангрен шаҳридаги “Озодлик”, “Аппартак”, “Янгиобод” ва “Бўстон”, шунингдек, Олмалиқ шаҳридаги “А.Навоий”, “М.Улуғбек”, “Темур Малик” ва “Ҳамза” маҳаллаларида амалга оширилган ўрганишлар асосида криминоген вазиятни барқарорлаштириш, аҳолининг ҳуқуқий маданиятини ошириш ҳамда профилактика ишлари самарадорлигини кучайтиришга қаратилган манзилли таклиф ва тавсиялар илгари сурилди.
Республика идоралараро мувофиқлаштириш штаби йиғилишида маҳаллаларда “манзилли ишлаш” тизимини самарали жорий этиш, жиноятчиликнинг барвақт профилактикасини кучайтиришга доир устувор вазифалар муҳокама қилиниб, Академия томонидан амалга оширилаётган таҳлиллар ва ёндашувлар ижобий баҳоланди.
Йиғилиш якунларига кўра, жиноятчиликнинг барвақт олдини олишга қаратилган фаолиятни илмий-методик жиҳатдан таъминлаш, ҳудудлар кесимида таҳлиллар асосида манзилли “йўл хариталари” ишлаб чиқиш ва амалиётга жорий этиш бўйича ишлар изчил давом эттирилиши белгиланди.