Ҳуқуқни муҳофаза қилиш академиясида Бош прокурор томонидан ўқув жараёнини прокуратура органларининг касбий фаолияти билан узвий боғлашга доир белгиланган вазифалар ижроси доирасида Ихтисослаштирилган прокурорлар корпуси ходимлари учун бинар ўқув машғулоти ташкил этилди.
Мазкур машғулот туман (шаҳар) прокурорлари ва уларга тенглаштирилган прокурорлар ёрдамчилари, шунингдек, вилоят прокуратуралари маҳкама ходимлари учун ўтказилаётган малака ошириш курси доирасида ташкил этилди ҳамда судларда жиноят ишлари кўрилишида давлат айбловини қўллаб-қувватлаш масалалари ва суд қарорлари ижросини таъминлашда прокуратура органларининг ролига бағишланди.
Машғулот Бош прокуратуранинг жиноий суд ишларини юритишда прокурор ваколатини таъминлаш бошқармаси катта прокурори С.Ахмедов ҳамда Академиянинг кафедра катта ўқитувчиси Б.Ярашев томонидан ўтказилди.
Бинар формат доирасида назарий ёндашувлар амалиёт билан уйғунлаштирилиб, жиноий суд ишларини юритишда прокурор ваколатларини самарали таъминлашда учраётган долзарб муаммолар ва уларни бартараф этиш механизмлари атрофлича кўриб чиқилди. Шунингдек, амалдаги талаблар ва устувор вазифалар ижроси юзасидан тингловчиларга аниқ тушунтиришлар берилди.
Машғулот интерактив тарзда ўтказилиб, тингловчилар ўзларини қизиқтирган саволларига жавоблар олдилар ҳамда касбий фаолиятда қўллаш мумкин бўлган амалий тавсияларга эга бўлдилар.