Прокуратура органларида комплаенс ва коррупцияга қарши курашиш тизими жорий этилганлиги муносабати билан Ўзбекистон Республикаси Ҳуқуқни муҳофаза қилиш академиясида шахсий хавфсизлик бўлинмалари ходимлари учун қисқа муддатли малака ошириш курси ташкил этилди.
Ўқув дастури доирасида тингловчилар халқаро стандартлар асосида прокуратура органларида комплаенс-менежмент тизимларини жорий этиш, коррупциявий хавф-хатарларни баҳолаш, ходимларни комплекс текшириш (due diligence), шунингдек коррупциянинг олдини олишнинг самарали механизмларини чуқур ўргандилар.
Машғулотларда рақамли криминалистика ва замонавий ахборот технологияларининг имкониятларига алоҳида эътибор қаратилди. Жумладан, OSINT инструментларидан фойдаланиш, электрон маълумотлар базалари билан ишлаш, очиқ манбалар таҳлили асосида хавфларни аниқлаш ва коррупциявий ҳуқуқбузарликларни дастлабки босқичларда фош этиш масалалари кўриб чиқилди.
Амалий кўникмаларни мустаҳкамлаш мақсадида Коррупцияга қарши курашиш агентлиги ва Божхона қўмитасида сайёр машғулотлар ташкил этилди ва тингловчилар коррупциявий хавф-хатарларни таҳлил қилиш ва бошқариш амалиёти билан танишдилар.
Курс якунида тингловчиларнинг билим ва кўникмалари баҳоланиб, уларга тегишли сертификатлар топширилди.