2026 йил 16 апрель куни Ўзбекистон Республикаси Ҳуқуқни муҳофаза қилиш академиясида киберхавфсизлик, сунъий интеллект ва рақамли технологиялар ривожланаётган шароитда ҳуқуқни муҳофаза қилиш органлари учун кадрлар тайёрлашнинг замонавий ёндашувларига бағишланган халқаро илмий-амалий конференция бўлиб ўтди.
Тадбир «Эл-юрт умиди» жамғармаси билан ҳамкорликда ташкил этилди ва гибрид форматда ўтказилди. Конференция ишида 10 дан ортиқ мамлакат ва халқаро ташкилотлардан 40 нафарга яқин хорижий ва халқаро экспертлар, шунингдек маҳаллий экспертлар, таълим ва ҳуқуқни муҳофаза қилиш муассасалари вакиллари, халқаро ташкилотлар ҳамда дипломатик корпус вакиллари иштирок этди.
Пленар сессияга Академия бошлиғи ўринбосари У.У.Нигмаджанов модераторлик қилди. Тадбирни очиб беришда Академия бошлиғининг биринчи ўринбосари Е.В.Коленко ва «Эл-юрт умиди» жамғармаси ижрочи директори Г.С.Исмаилова қутлов сўзи билан иштирок этдилар.
Пленар сессия доирасида Е.В.Коленко ҳуқуқни муҳофаза қилиш ва куч тузилмалари ходимлари учун малака ошириш ва хорижий стажировкаларнинг янги каскадли тизимини тақдим этди, шунингдек замонавий таҳдидлар жадал мураккаблашаётган шароитда кадрлар тайёрлаш тизимини трансформация қилиш давлат хавфсизлигини таъминлашнинг ажралмас қисмига айланаётганини таъкидлади.
Унинг қайд этишича, устувор вазифа – мавжуд чақириқларга нафақат жавоб қайтара оладиган, балки уларни олдиндан прогноз қила оладиган, сунъий интеллект, киберхавфсизлик ва аналитик инструментлар имкониятларидан самарали фойдаланадиган янги авлод мутахассисларини шакллантиришдан иборат. Шунингдек, таълим, илм-фан ва амалиёт интеграциясига асосланган кадрлар тайёрлашнинг мутлақо янги моделига ўтиш, шунингдек халқаро ҳамкорликни ривожлантириш тайёргарлик сифатини оширишнинг энг муҳим омили эканига алоҳида эътибор қаратилди.
Конференция давомида кадрлар тайёрлаш тизимини трансформация қилишнинг асосий йўналишлари, жумладан замонавий технологияларни таълим жараёни ва амалий фаолиятга жорий этиш, халқаро ҳамкорликни ривожлантириш ва касбий тайёргарлик дастурларини кенгайтириш масалалари муҳокама қилинди.
Алоҳида маърузалар блоки ҳуқуқни муҳофаза қилиш органлари ходимларини ўқитиш ва малакасини ошириш тизимини модернизация қилиш масалаларига бағишланди. Каскадли тайёргарлик моделини жорий этиш, халқаро стажировкаларни кенгайтириш, шунингдек хорижда таълим олиш имкониятларига оид ёндашувлар тақдим этилди.
Хавфсизликни таъминлашнинг технологик жиҳатларига катта эътибор қаратилди. Сунъий интеллект, рақамли криминалистика, квант ҳисоблашлари, машинали ўқитиш, шунингдек ҳуқуқни муҳофаза қилиш ва суд фаолиятида рақамли далиллардан фойдаланиш масалалари кўриб чиқилди.
Алоҳида йўналиш сифатида кибертаҳдидларга қарши курашиш, антифрод тизимларини ривожлантириш, дронлар ва робототехникани интеграция қилиш, шунингдек рақамли муҳит шароитида идоралараро ҳамкорликни такомиллаштиришга доир амалий ечимлар муҳокама қилинди.
Халқаро экспертларнинг маърузалари кадрлар тайёрлаш ва инновацион технологияларни жорий этиш бўйича илғор хорижий тажрибалар билан танишиш, шунингдек касбий таълим тизимини янада ривожлантиришнинг истиқболли йўналишларини белгилаб олиш имконини берди.
Конференция якунлари бўйича Академия томонидан «Эл-юрт умиди» жамғармаси, АҚШ Адлия вазирлигининг Тергов кадрларини тайёрлашга кўмаклашиш халқаро дастури (ICITAP) офиси билан халқаро ҳамкорликни ривожлантиришга қаратилган икки томонлама меморандумлар имзоланди.
Конференция ҳуқуқни муҳофаза қилиш органлари учун кадрлар тайёрлаш соҳасида илғор тажриба алмашиш, замонавий чақириқларни муҳокама қилиш ва амалий ечимлар ишлаб чиқиш учун муҳим майдон бўлиб хизмат қилди.