Маҳаллаларда хавфсиз муҳитни таъминлаш ва ҳуқуқбузарликларнинг барвақт олдини олиш самарадорлигини оширишга қаратилган вазифалар ижроси доирасида Ўзбекистон Республикаси Ҳуқуқни муҳофаза қилиш академияси томонидан Тошкент шаҳрининг Яшнобод, Шайхонтоҳур ва Бектемир туманларида фаолият юритаётган маҳалла хотин-қизлар фаоллари учун сайёр ўқув машғулотлари ташкил этилди.
Машғулотларда 70 нафарга яқин хотин-қизлар фаоллари иштирок этмоқда. Асосий эътибор уларнинг замонавий бошқарув кўникмаларини ривожлантириш, ҳудудларда ижтимоий барқарорликни таъминлаш ҳамда рақамли трансформация жараёнларини жадаллаштиришга қаратилган.
Ўқув дастури жиноятларни барвақт олдини олиш, ижтимоий профилактика, наркожиноятларга қарши курашиш, маъмурий-юрисдикцион фаолият, амалий психология, муаммоли социология, рақамли саводхонлик ва кибермаданиятни шакллантириш каби йўналишларни қамраб олган.
Шу билан бирга, оилавий (маиший) зўравонликнинг олдини олиш, хотин-қизлар ва болалар ҳуқуқларини ҳимоя қилиш, ахлоққа қарши жиноятларни барвақт профилактика қилиш, мураккаб ижтимоий ҳолатга тушган хотин-қизлар билан ишлаш самарадорлигини ошириш масалаларига алоҳида эътибор қаратилмоқда.
Машғулотларда хотин-қизлар фаоллари фаолиятидаги коррупцион омилларни аниқлаш ва бартараф этиш, миграциядан қайтган хотин-қизларнинг ижтимоий мослашуви ва реинтеграцияси, оилавий ва ижтимоий низоларни таҳлил қилиш, шунингдек наркотик ва психотроп моддаларга мойил шахсларни аниқлаш бўйича амалий кўникмалар шакллантирилмоқда.
Шунингдек, фаолларнинг фаолиятини режалаштириш, манзилли профилактик чора-тадбирларни амалга ошириш ва аҳоли билан самарали мулоқотни йўлга қўйишга алоҳида урғу берилмоқда.
Ўқув жараёни якунида иштирокчиларнинг билим ва кўникмалари баҳоланиб, машғулотларни муваффақиятли тамомлаганларга малака оширганлиги тўғрисида сертификатлар берилиши режалаштирилган.
Мазкур машғулотлар маҳалла институтини мустаҳкамлаш, профилактика ишлари самарадорлигини ошириш ва барқарор ижтимоий муҳитни шакллантиришга хизмат қилмоқда.