Ҳуқуқни муҳофаза қилиш академияси делегацияси Туркия Республикасининг Истанбул шаҳрида Туркия ҳамкорлик ва мувофиқлаштириш агентлиги (TİKA) ҳамкорлигида инсон ҳуқуқлари бўйича халқаро таълим дастури доирасида ташкил этилган семинар-тренингда иштирок этди.
Тадбирда Ўзбекистон, Озарбайжон, Қозоғистон, Қирғизистон ва Шимолий Кипр Турк Республикасининг таълим муассасалари вакиллари қатнашиб, инсон ҳуқуқларини таъминлаш соҳасидаги замонавий ёндашувлар, халқаро механизмлар ва ҳуқуқни қўллаш амалиётини такомиллаштириш масалалари муҳокама қилдилар.
Хусусан, БМТнинг инсон ҳуқуқлари бўйича механизмлари, асосий халқаро пакт ва конвенциялар, шунингдек Европа инсон ҳуқуқлари суди қарорларини ижро этиш масалаларига алоҳида эътибор қаратилди.
Академия вакиллари Ўзбекистонда инсон ҳуқуқларини ҳимоя қилиш соҳасида амалга оширилаётган ислоҳотлар ва прокурор назоратининг асосий вазифаларига бағишланган тақдимотлар билан иштирок этдилар.
Семинар якунида инсон ҳуқуқлари соҳасида халқаро ҳамкорликни кенгайтириш, тажриба алмашинувини кучайтириш ва қўшма таълим ҳамда тадқиқот ташаббусларини ривожлантириш юзасидан келишувга эришилди.