Ўзбекистон Республикаси Президенти томонидан белгиланган вазифалар ижросини таъминлаш доирасида Ҳуқуқни муҳофаза қилиш академияси томонидан Тошкент шаҳрининг Яшнобод, Шайхонтоҳур ва Бектемир туманларидаги маҳаллаларда фаолият юритаётган ёшлар етакчилари учун сайёр ўқув курси давом этмоқда.
136 та маҳаллада фаолият юритаётган ёшлар етакчилари қамраб олинган мазкур ўқув курси ҳудудларда ижтимоий барқарорликни таъминлаш, ҳуқуқбузарликларнинг барвақт олдини олиш ва рақамли трансформация жараёнларига мослашувни жадаллаштиришга қаратилган.
Ўқув дастури доирасида иштирокчиларга жиноятларни барвақт олдини олиш, ижтимоий профилактика, наркожиноятларга қарши курашиш, маъмурий-юрисдикцион фаолият, амалий психология, муаммоли социология, рақамли саводхонлик ва кибермаданиятни шакллантириш каби йўналишларда амалий билимлар берилаётир.
Шунингдек, машғулотларда ёшлар ўртасида психотроп ва наркотик моддалар истеъмолининг олдини олиш, ёшлар жиноятчилигининг ўзига хос жиҳатлари, носоғлом оилавий муҳитда тарбияланаётган ёшлар билан ишлаш, ёшлар етакчилари фаолиятидаги коррупцион хавфларни бартараф этиш, ёшларнинг бўш вақтларини мазмунли ташкил этиш, уларнинг ижтимоий фаоллиги ва волонтёрлик ҳаракатларини рағбатлантириш масалаларига алоҳида эътибор қаратилмоқда.
Бундан ташқари, ижтимоий профилактикани амалга оширишда профилактика инспекторлари билан ҳамкорликни кучайтириш, “оталиққа олиш” механизмларини амалиётга жорий этиш ҳамда тарбияси оғир ёшлар билан ишлашнинг самарали усуллари юзасидан аниқ тавсиялар берилмоқда.
Машғулотлар жараёнида иштирокчиларнинг касбий компетенцияларини мустаҳкамлаш, раҳбарлик, тезкор қарор қабул қилиш ва рақамли муҳитда самарали фаолият юритиш кўникмаларини ривожлантиришга устувор аҳамият қаратилмоқда.
Ўқув курси якунида иштирокчиларнинг билим ва кўникмалари баҳоланиб, муваффақиятли тингловчиларга Академия томонидан малака оширганлик сертификатлари тақдим этилади.
Мазкур сайёр ўқув курси маҳаллаларда хавфсиз муҳитни шакллантириш, ҳуқуқбузарликларнинг олдини олиш тизими самарадорлигини ошириш ва ёшлар билан ишлашнинг замонавий ёндашувларини ривожлантиришга хизмат қилмоқда.