Ёшларда жиноий даромадларни легаллаштириш ва терроризмни молиялаштиришга қарши курашиш соҳасида тизимли билим ва амалий кўникмаларни шакллантириш, шунингдек энг салоҳиятли кадрларни аниқлаш мақсадида молиявий хавфсизлик бўйича республика туркум олимпиадалари таъсис этилди.
Олимпиадалар Ўзбекистон Республикаси олий таълим муассасалари талабалари ўртасида қуйидаги йўналишлар бўйича ўтказилади: иқтисодий хавфсизлик, юриспруденция, халқаро муносабатлар ва ахборот хавфсизлиги.
Олимпиадада бакалавриат (1–3-курс) ва магистратура кундузги таълим шакли талабалари, шу жумладан чет эл фуқаролари иштирок этишлари мумкин.
Олимпиадаларнинг асосий мақсади – ёшларнинг молиявий, ҳуқуқий ва ахборот саводхонлигини ошириш, таҳлилий фикрлашни ривожлантириш, шунингдек мазкур соҳада чуқур билим ва амалий кўникмаларга эга иқтидорли талабаларни аниқлашдан иборат.
Олимпиада уч босқичда ўтказилади:
дастлабки босқич – ҳар йили 15 апрелгача;
саралаш босқичи – ҳар йили 15 майгача республика миқёсида;
якуний босқич – сентябрь-октябрь ойларида.
Республика босқичи якунларига кўра энг юқори натижаларни қайд этган 10 нафар иштирокчи жорий йил сентябрь–октябрь ойларида Россия Федерациясида ўтказиладиган “Молиявий хавфсизлик” бўйича VI Халқаро олимпиада финалида Ўзбекистон номидан иштирок этади.
Олимпиаданинг расмий тили – рус тили, ишчи тиллари – рус, ўзбек ва инглиз тилларидир.