Ўзбекистон Республикаси Ҳуқуқни муҳофаза қилиш академияси вакиллари Лунд университети (Швеция) томонидан POLCA («Марказий Осиёда ҳуқуқий ва давлат бошқаруви соҳасидаги ислоҳотларнинг сиёсий иқтисодиёти») лойиҳаси доирасида ташкил этилган халқаро илмий семинарда иштирок этдилар. Мазкур тадбир Туркия Республикасининг Истанбул шаҳрида бўлиб ўтди.
Семинарда Европа ва Марказий Осиё давлатларининг 30 дан ортиқ етакчи олий таълим муассасалари, таҳлил марказлари, давлат ва нодавлат ташкилотлари вакиллари иштирок этдилар.
Семинарнинг асосий мақсади ҳуқуқ ва давлат бошқаруви соҳасидаги тадқиқотларнинг методологик ҳамда назарий асосларини муҳокама қилиш, шунингдек маъмурий ислоҳотлар ва минтақавий ҳамкорлик масалалари бўйича экспертлар ўртасида ўзаро ҳамкорликни ривожлантиришдан иборат бўлди.
Семинар давомида иштирокчилар маҳаллий ва глобал тадқиқотларнинг ижтимоий-ҳуқуқий тизимлар ҳамда иқтисодий таҳлилга таъсири, тадқиқот этикаси ва гендер масалалари, ҳуқуқ ва давлат бошқарувидаги замонавий илмий моделлар ва ёндашувлар, жамоатчилик иштирокини таъминлаш, жиноятчилик ва коррупцияга қарши курашиш, қонун ижодкорлиги ва ҳуқуқни қўллаш амалиётини такомиллаштириш, электрон ҳукуматни ривожлантириш ҳамда миллий институтларнинг ўрни каби масалаларни муҳокама қилдилар.
Шунингдек, илмий фаолиятнинг амалий жиҳатларига алоҳида эътибор қаратилди. Жумладан, халқаро нуфузли нашрларда илмий мақолаларни тайёрлаш ва чоп этиш, шунингдек тадқиқотлар самарадорлигини оширишга қаратилган замонавий методологик ёндашувлар муҳокама қилинди.
Мазкур тадбирда иштирок этиш Академиянинг халқаро илмий ҳамкорлигини мустаҳкамлашга, илғор ёндашувларни жорий этишга ҳамда қонунчилик ва давлат бошқаруви соҳасида амалга оширилаётган ислоҳотларни самарали таъминлашга хизмат қилади.