Ҳуқуқни муҳофаза қилиш академияси илмий нашрлар тизимини изчил кенгайтирмоқда: белгиланган тартибда Олий аттестация комиссиясида “Социология ва ҳуқуқ” номли янги илмий-амалий журнал рўйхатдан ўтди.
Мазкур журналнинг ташкил этилиши Академияда ҳуқуқий илм-фанни ривожлантириш ва ҳуқуқ ҳамда ижтимоий жараёнлар ўртасидаги ўзаро боғлиқликни чуқур ўрганишга қаратилган тизимли ишларнинг мантиқий давоми ҳисобланади.
Янги нашр ҳуқуқий воқеликни ижтимоий ўлчов билан уйғун ҳолда комплекс таҳлил қилишга йўналтирилган бўлиб, ҳуқуқий ислоҳотларнинг жамиятга таъсири, аҳолининг ҳуқуқий маданияти ва ҳуқуқий онги, давлат институтларига бўлган ишонч, шунингдек ҳуқуқбузарликларнинг ижтимоий омиллари ва уларни олдини олиш масалаларини қамраб олади.
Журнал доирасида ёшлар, оила, миграция, гендер тенглик, ижтимоий адолат ва рақамли жамият каби долзарб йўналишлар ҳам кенг ёритилади.
“Социология ва ҳуқуқ” журнали Академия илмий нашрлари тизимини бойитиб, ҳуқуқшунослар ва ижтимоий тадқиқотчилар ўртасидаги илмий мулоқотни ривожлантириш, амалий тадқиқотларни қўллаб-қувватлаш ҳамда ҳуқуқий сиёсат соҳасида илмий асосланган ёндашувларни шакллантиришга хизмат қилади.
Илмий нашрлар тизимининг кенгайиши Академиянинг мамлакатда ҳуқуқий илм-фан ва амалий тадқиқотлар маркази сифатидаги ўрнини янада мустаҳкамлайди.