Ҳуқуқни муҳофаза қилиш академиясида прокуратура органлари амалиётига интеграция қилинган ўқув жараёни доирасида Ихтисослаштирилган прокурорлар корпусининг туман (шаҳар) прокурорлари, уларга тенглаштирилган прокурорлар ёрдамчилари ҳамда вилоят прокуратуралари маҳкама ходимлари учун малака ошириш курси якунланди.
Курс «Судларда давлатнинг қонун билан қўриқланадиган манфаатларини ҳимоя қилиш мақсадида давлат мулкига етказилган зарар ва давлат бюджетидан ундирувлар билан боғлиқ низоларни ҳал қилишда прокурор иштирокининг самарадорлигини ошириш» мавзусига бағишланди.
Ўқув машғулотлари давомида фуқаролик судларида давлат мулки билан боғлиқ низолар кўрилишида прокурор иштирокининг самарадорлигини таъминлаш, суд қарорлари ижросини ташкил этиш механизмлари ҳамда ҳуқуқни қўллаш амалиётида ягона ёндашувларни шакллантириш масалалари чуқур таҳлил қилинди.
Шу билан бирга, соҳа мутахассислари иштирокида суд амалиётида учраётган муаммолар атрофлича кўриб чиқилиб, уларни бартараф этиш бўйича аниқ тавсиялар ишлаб чиқилди ҳамда иштирокчиларга амалий тушунтиришлар берилди.
Курс якунида тингловчиларнинг билим ва кўникмалари баҳоланди. Шунингдек, улар томонидан амалиётдаги муаммолар таҳлили асосида қонун ҳужжатларини такомиллаштиришга қаратилган таклифлар муҳокама қилинди.