Ўзбекистон Республикаси Ҳуқуқни муҳофаза қилиш академияси делегацияси Польшанинг Гданьск ва Варшава университетларига ташриф буюрди. Ташрифдан мақсад ўзаро ҳамкорликни мустаҳкамлаш, қўшма таълим дастурлари ва академик алмашинувни ривожлантириш, шунингдек юридик таълим ва илмий тадқиқотлар соҳасида тажриба алмашишдан иборат бўлди.
Ташриф дастури Гданьск университетидан бошланиб, университет ректори, профессор П.Степновский билан учрашув ўтказилди. Музокараларда олий таълим соҳасида ҳамкорликни кенгайтириш, қўшма илмий лойиҳаларни амалга ошириш ва академик алмашинувни йўлга қўйиш масалалари муҳокама қилинди. Учрашув якунида Академия ва Гданьск университети ўртасида академик алмашинувга оид келишув имзоланди.
Шунингдек, илмий ишлар бўйича проректор В.Ласковский, Ҳуқуқ ва бошқарув факультети декани В.Залевский, халқаро ҳамкорлик бўйича декан ўринбосари М.Вишовати ҳамда Гданьск минтақавий прокуратураси вакили М.Шумахер билан учрашувлар ўтказилди. Уларда жиноий одил судлов, криминология ва ҳуқуқбузарликлар профилактикаси соҳаларида қўшма тадқиқот ва лойиҳаларни амалга ошириш, қўшма таълим дастурларини йўлга қўйиш, Академиянинг иқтидорли талабалари учун грантлар ажратиш, академик алмашинув ва стажировкаларни ташкил этиш, шунингдек юридик таълимда назария ва амалиёт уйғунлигини таъминлаш масалалари муҳокама қилинди.
Варшава университети Ҳуқуқ ва бошқарув факультети раҳбарияти билан учрашувда стратегик ҳамкорликни ривожлантириш, қўшма лойиҳалар ва академик алмашинув дастурларини амалга ошириш масалалари кўриб чиқилди.
Ташриф доирасида делегация университетларнинг инфратузилмаси, жумладан марказий кутубхоналар, ўқув аудиториялари, суд имитация хоналари, шунингдек барқарор ривожланиш тамойилларини жорий этиш амалиёти билан танишди. Гданьск университетининг криминалистика музейи ҳамда Варшава университети Марказий кутубхонаси ва унинг томида барпо этилган Европадаги йирик яшил ҳиёбон иштирокчиларда катта таассурот қолдирди.
Шунингдек, Польша Академик алмашинувлар миллий агентлиги (NAWA) раҳбарияти билан учрашув ўтказилиб, академик алмашинув, докторантура, стажировка ва қўшма тадқиқот дастурларини ривожлантириш масалалари муҳокама қилинди.
Ташриф ўзаро манфаатли ва сермаҳсул музокараларга бой бўлиб, халқаро ҳамкорликни янада мустаҳкамлашга хизмат қилди ҳамда муҳим келишувларга эришиш имконини берди.