Ўзбекистон Республикаси Ҳуқуқни муҳофаза қилиш академиясида талабаларнинг спортга бўлган қизиқишини ошириш, соғлом турмуш тарзини тарғиб қилиш ва жисмоний тарбияни ривожлантириш мақсадида Олимпия ва жаҳон чемпионлари” билан учрашув ўтказилди.
Тадбирда Ўзбекистон Республикаси Мудофаа вазирлиги ҳарбий хизматчилари – бокс бўйича халқаро тоифадаги спорт устаси, икки карра Осиё ва жаҳон чемпионатлари совриндори капитан Бектемир Мелиқўзиев ҳамда таэквондо бўйича халқаро тоифадаги спорт устаси, Универсиада ғолиби, жаҳон чемпиони, Осиё ўйинлари совриндори катта лейтенант Дмитрий Шокин иштирок этдилар.
Учрашув давомида спортчилар ўзларининг спортдаги фаолият йўли, эришган ютуқлари, хизмат ва спортни уйғун олиб бориш тажрибаси ҳақида сўзлаб бердилар. Шунингдек, спорт ва жисмоний тарбиянинг инсон ҳаётидаги ўрни, интизом ва матонатни шакллантиришдаги аҳамияти алоҳида таъкидланди.
Тадбир очиқ ва самимий муҳитда ўтди, талабалар ўзларини қизиқтирган саволларга бевосита жавоб олиш имконига эга бўлдилар.
Бундай учрашувлар талабаларнинг спортга бўлган қизиқишини оширишга, соғлом турмуш тарзини шакллантиришга ҳамда келгусидаги хизмат фаолиятида зарур бўлган шахсий сифатларни ривожлантиришга хизмат қилади.