Ўзбекистон Республикаси Ҳуқуқни муҳофаза қилиш академияси томонидан “Ориент Финанс” хусусий акциядорлик тижорат банки билан ҳамкорликда банк комплаенс бўлинмаси ходимлари учун жиноий даромадларни легаллаштириш ва терроризмни молиялаштиришга қарши курашиш масалаларига бағишланган малака ошириш ўқув семинари ташкил этилди.
Семинар доирасида иштирокчиларга миллий қонунчилик нормалари, халқаро ФАТФ стандартлари талаблари, молиявий операциялардаги хатарлар, санкциявий чекловлар ҳамда шубҳали операцияларни аниқлаш мезонлари юзасидан тизимли билимлар тақдим этилди. Алоҳида эътибор банк амалиётида учрайдиган камчиликлар ва уларни бартараф этиш механизмларига қаратилди.
Ўқув жараёни назария билан чекланиб қолмай, халқаро стандартларни миллий амалиётга татбиқ этиш, таваккалчиликка асосланган ёндашувни кучайтириш ва мижозларни лозим даражада ўрганиш масалалари реал кейслар асосида таҳлил қилинди. Муҳокамалар очиқ мулоқот ва савол-жавоб форматида ташкил этилди.
Семинарда Марказий банк, Бош прокуратура ҳузуридаги Иқтисодий жиноятларга қарши курашиш департаменти, Истиқболли лойиҳалар миллий агентлиги ҳамда “Узумбанк” АЖ мутахассислари иштирок этиб, соҳадаги илғор тажриба ва амалий ёндашувлар билан ўртоқлашдилар.
Якунда иштирокчилар ички назорат тизимини самарали ташкил этиш, хавфларни баҳолаш, шубҳали операцияларни таҳлил қилиш ва комплаенс маданиятини мустаҳкамлаш бўйича аниқ амалий кўникмаларга эга бўлдилар.
Тадбир якунида таъкидланганидек, мазкур ҳамкорлик молия секторида қонун устуворлиги, шаффофлик ва хавфсизликни таъминлашга қаратилган тизимли саъй-ҳаракатларни янада кучайтиришга хизмат қилади.