Ўзбекистон Республикаси Ҳуқуқни муҳофаза қилиш академиясида анъанавий тарзда ўтказиб келинаётган «Юридик фан ва ҳуқуқни қўллаш амалиётининг долзарб масалалари» мавзусидаги республика илмий-амалий конференцияси бўлиб ўтди.
Конференцияда Тошкент давлат юридик университети, Ўзбекистон Республикаси Одил судлов академияси, Инсон ҳуқуқлари бўйича Миллий маркази ҳамда бошқа миллий ҳамкор ташкилотлар вакиллари, шунингдек Беларусь Республикасининг Янка Купала номидаги Гродно давлат университети, Латвия Республикасининг «Туриба» университети юридик факультети профессор-ўқитувчилари, ёш олимлар ва тадқиқотчилар иштирок этди.
Тадбирнинг асосий мақсади юридик фанни ривожлантириш, ҳуқуқни қўллаш амалиёти билан илмий тадқиқотлар ўртасидаги узвий боғлиқликни мустаҳкамлаш ҳамда соҳадаги долзарб масалалар юзасидан илмий асосланган таклиф ва тавсиялар ишлаб чиқишдан иборат бўлди.
Конференция доирасида илм-фан ва инновацияларни ривожлантириш, илмий лойиҳаларни молиялаштириш ва тижоратлаштириш, юридик кадрлар тайёрлаш, қонунчиликни такомиллаштириш ҳамда ҳуқуқни қўллаш амалиёти самарадорлигини ошириш масалалари муҳокама қилинди.
Шунингдек, инсон ҳуқуқларини таъминлаш, фуқаролик ва маъмурий суд ишларини юритиш, меҳнат низолари, жиноят-процессуал исботлаш, атроф-муҳитни муҳофаза қилиш, ностандарт бандликни ҳуқуқий тартибга солиш каби йўналишлар бўйича фикр алмашилди.
Тадбирда сунъий интеллект ва блокчейн технологияларини ҳуқуқни қўллаш амалиётига жорий этиш билан боғлиқ ҳуқуқий масалалар, коррупцияга қарши курашиш, жиноятларни криминализация қилиш ҳамда янги институционал механизмларни жорий этишнинг замонавий ёндашувлари ҳам муҳокама марказида бўлди.
Конференция якунлари бўйича юридик фанни ривожлантириш, қонунчиликни такомиллаштириш ва ҳуқуқни қўллаш амалиёти самарадорлигини оширишга қаратилган илмий-амалий тавсиялар ишлаб чиқилиши таъкидланди. Тадбир материаллари асосида илмий мақолалар тўплами чоп этилиши режалаштирилди.