Ўзбекистон Республикаси Ҳуқуқни муҳофаза қилиш академиясига Туркия Республикаси Адлия академияси президенти Метин Йилдирим бошчилигидаги делегация ташриф буюрди.
Ташриф доирасида томонлар прокуратура ва тергов органлари учун кадрлар тайёрлаш, қайта тайёрлаш ва малакасини оширишнинг замонавий механизмлари, юридик таълим тизимига илғор педагогик ёндашувлар ва рақамли технологияларни жорий этиш, шунингдек таълим, илм-фан ва ҳуқуқни қўллаш амалиёти интеграцияси масалалари юзасидан фикр алмашдилар.
Меҳмонларга Академияда амалга оширилаётган амалиётга йўналтирилган таълим жараёнлари, рақамли криминалистика соҳасидаги илмий ва амалий ишланмалар, Коррупцияга қарши курашиш виртуал академияси фаолияти, шунингдек замонавий криминалистик полигонлар, махсус лабораториялар, суд жараёнлари имитацияси заллари ва бошқа махсус ўқув объектлари таништирилди.
Туркия томони Академияда жорий этилган инновацион ёндашувлар, рақамли криминалистика инфратузилмаси, замонавий ўқув муҳити ҳамда юқори малакали кадрлар салоҳиятини алоҳида эътироф этди.
Учрашув давомида ҳуқуқни муҳофаза қилиш соҳаси учун кадрлар тайёрлашда тажриба алмашиш, қўшма таълим ва илмий лойиҳаларни амалга ошириш, шунингдек институционал ҳамкорликни кенгайтириш истиқболлари муҳокама қилинди.
Музокаралар якунлари бўйича томонлар икки давлат ўртасида ҳуқуқий таълим ва профессионал тайёргарлик соҳасидаги ҳамкорликни янада мустаҳкамлашдан манфаатдор эканликларини тасдиқладилар.