9 май – Хотира ва қадрлаш куни муносабати билан Ўзбекистон Республикаси Ҳуқуқни муҳофаза қилиш академияси талабалари учун навбатдаги маънавий-маърифий тадбир ташкил этилди.
Тадбирдан кўзланган мақсад ёшларни ҳарбий-ватанпарварлик руҳида тарбиялаш, уларда Ватанга муҳаббат, тарихий хотирага ҳурмат, инсон қадрини улуғлаш, меҳр-оқибат ва фидойилик каби эзгу фазилатларни янада мустаҳкамлашдан иборат бўлди.
Тадбир доирасида талабаларнинг «Ғалаба боғи» ёдгорлик мажмуаси ҳамда «Шон-шараф» давлат музейига ташрифи ташкил этилди. Ташриф давомида улар ўзбек халқининг Иккинчи жаҳон уруши йилларидаги шонли тарихи, фронт ва фронт ортида кўрсатган жасорати, матонати ва қаҳрамонликлари билан яқиндан танишдилар.
Шунингдек, талабалар учун «Шон-шараф» давлат музейи масъул ходими, Мудофаа вазирлигининг истеъфодаги офицери, захирадаги подполковник А.Раҳимов билан учрашув ташкил этилди. Учрашувда Иккинчи жаҳон уруши йилларида халқимизнинг ғалабага қўшган ҳиссаси, тинчлик ва барқарорликнинг қадри, шунингдек мамлакатимизда мудофаа ва хавфсизлик соҳаларида амалга оширилаётган ислоҳотлар ҳақида фикр юритилди.
Ташриф якунида музейнинг анжуманлар залида талабаларга «Илҳақ» бадиий фильми намойиш этилди.
Мазкур тадбир ёш авлод қалбида бугунги тинч ва осойишта ҳаёт, мусаффо осмон ҳамда барқарорликнинг бебаҳо неъмат эканини чуқур англаш, уларни асраб-авайлаш ҳар бир фуқаронинг муқаддас бурчи эканини сингдиришга хизмат қилди.
Академияда бу каби маънавий-маърифий тадбирларни тизимли ва доимий равишда ташкил этиш давом эттирилади.