9 май – Хотира ва қадрлаш куни муносабати билан Ўзбекистон Республикаси Ҳуқуқни муҳофаза қилиш академиясида ёшларни ҳарбий-ватанпарварлик руҳида тарбиялаш, уларда Ватанга садоқат ва фидойилик туйғуларини мустаҳкамлаш, шунингдек келгуси хизмат фаолиятига тайёргарлик даражасини ошириш мақсадида бакалавриатнинг 1-курс ўқув гуруҳлари ўртасида “Саф тайёргарлиги” бўйича мусобақа ташкил этилди.
Тадбирнинг тантанали очилиш маросимида Ўзбекистон Республикаси Миллий гвардиясининг Ҳарбий мусиқа академик лицейи ўқувчилари томонидан намойиш этилган чиқишлар иштирокчилар ва меҳмонларда катта таассурот қолдирди.
Мусобақа жараёнида жамоалар саф майдонида тантанали юриш, саф қўшиғи билан ҳаракатланиш ҳамда жамоавий мувофиқлик ва интизом борасидаги кўникмаларини намоён этдилар. Иштирокчиларнинг чиқишлари Миллий гвардия офицер-ходимлари ва ҳарбий хизматчиларидан иборат ҳакамлар ҳайъати томонидан баҳоланди.
Мусобақа якунларига кўра, бакалавриатнинг “Тергов фаолияти” йўналиши 1 курс “А” поток 1-гуруҳи ғолибликни қўлга киритди. Иккинчи ўрин мазкур йўналишнинг рус тилида таълим олувчи гуру, учинчи ўрин эса “А” поток 3-гуруҳига насиб этди.
Ғолиб ва фаол иштирокчилар диплом, кубок ҳамда эсдалик совғалари билан тақдирланди.
Мазкур тадбир ёшларнинг жисмоний ва маънавий-руҳий тайёргарлигини мустаҳкамлаш, уларда интизом, жамоавийлик ва Ватан олдидаги юксак масъулият туйғусини шакллантиришга хизмат қилди.