Ўзбекистон Республикаси Ҳуқуқни муҳофаза қилиш академияси Ўзбекистон Республикаси Президентининг 2026 йил 5 январдаги ПҚ–1-сон, ПҚ–2-сон қарорлари ва бошқа тегишли ҳужжатлар, шунингдек, жорий йил 27 январь куни Тошкент шаҳрида хавфсиз муҳитни шакллантириш ҳамда жамоат хавфсизлигини самарали таъминлаш бўйича намунавий амалиётни яратиш чора-тадбирлари юзасидан ўтказилган видеоселектор йиғилишида берилган топшириқлар ижросини таъминлашга қаратилган амалий ишларни давом эттирмоқда.
Мазкур ишлар доирасида Академия томонидан Тошкент шаҳрининг Академияга бириктирилган Яшнобод, Шайхонтоҳур ва Бектемир туманларидаги барча 136 та маҳаллада фаолият юритаётган ҳоким ёрдамчилари учун махсус сайёр ўқув курси ташкил этилмоқда. Машғулотлар Академиянинг профессор-ўқитувчилари ва соҳавий мутахассислари томонидан олиб борилмоқда.
Ўқув курси ҳоким ёрдамчиларининг замонавий бошқарув кўникмаларини ривожлантириш, жойларда иш самарадорлигини ошириш, ижтимоий барқарорликни мустаҳкамлаш, рақамли трансформация жараёнларини жадаллаштириш ҳамда аҳоли муаммоларини ўз вақтида аниқлаш ва ҳал этиш учун зарур амалий компетенцияларни шакллантиришга қаратилган.
Машғулотлар давомида иштирокчиларга жиноятларни барвақт олдини олиш, ижтимоий профилактика, наркожиноятларга қарши курашиш, маъмурий-юрисдикцион фаолият, амалий психология, амалий социология, рақамли саводхонлик ва кибермаданиятни шакллантириш каби йўналишлар бўйича амалий билимлар берилмоқда.
Шу билан бирга, аҳолини касбга тайёрлаш, чет тилларига ўқитиш, фуқароларни тадбиркорликка жалб этиш, маҳаллаларни ихтисослаштириш, кооперация ва драйвер йўналишларни ривожлантириш, маҳалла имкониятларидан самарали фойдаланиш, аҳоли бандлигини таъминлаш, фуқаролар мурожаатлари билан ишлаш, замонавий ахборот тизимлари ва рақамли платформалардан фойдаланиш масалаларига алоҳида эътибор қаратилмоқда.
Курснинг муҳим йўналишларидан бири сифатида кибермаданиятни ривожлантириш ва киберхавфлардан ҳимояланиш масалалари ҳам қамраб олинган бўлиб, бу рақамли хизматлар кенгайиб бораётган ҳамда ахборот технологияларининг жойлардаги фаолиятдаги ўрни ортиб бораётган ҳозирги шароитда алоҳида аҳамият касб этади.
Машғулотларда асосий эътибор ҳоким ёрдамчиларининг касбий компетенцияларини мустаҳкамлаш, раҳбарлик салоҳияти, тезкор қарор қабул қилиш, рақамли муҳитда самарали ишлаш ҳамда аҳолига сифатли хизмат кўрсатиш кўникмаларини янада ривожлантиришга қаратилмоқда.
Ўқув жараёни якунида иштирокчиларнинг билим ва кўникмалари якуний назорат асосида баҳоланади ҳамда машғулотларни муваффақиятли тамомлаганларга Академияда малака оширганлиги тўғрисидаги сертификатлар берилиши режалаштирилган.
Мазкур махсус курс маҳалла даражасида самарали бошқарув тизимини йўлга қўйиш, белгиланган вазифаларни сифатли бажариш, ҳуқуқбузарликлар профилактикаси тизимини кучайтириш ҳамда ҳудудларни рақамли жамият шароитига мослаштиришда муҳим аҳамият касб этади.
Академиянинг маҳаллаларда хавфсиз муҳитни яратиш ва ҳуқуқбузарликларнинг олдини олиш тизими самарадорлигини янада оширишга қаратилган амалий ишлари изчил давом эттирилмоқда.