2026 йил 21–22 май кунлари Ўзбекистон Республикаси Ҳуқуқни муҳофаза қилиш академиясида «Рақамли даврда қонун устуворлигини таъминлаш: инновациялар, инсон ҳуқуқлари ва хавфсизлик мутаносиблиги» мавзусида «Tashkent Cyberlex – 2026» халқаро илмий-амалий форуми ўтказилади.
Форум замонавий рақамли таҳдидларга қарши курашишнинг ҳуқуқий, криминалистик ва таълимга оид жиҳатларини муҳокама қилиш учун халқаро экспертлар майдонига айланади. Кибержиноятларни фош этиш, рақамли криминалистикани ривожлантириш, рақамли далиллардан фойдаланиш, жиноят суд ишларини юритишда сунъий интеллектни қўллаш, шунингдек рақамли трансформация шароитида шахснинг ҳуқуқ ва эркинликларини ҳимоя қилиш масалалари форумнинг асосий муҳокама йўналишлари бўлади.
Тадбирда давлат органлари раҳбарлари, миллий ва хорижий ҳуқуқни муҳофаза қилувчи тузилмалар, олий таълим ва илмий муассасалар, халқаро ташкилотлар вакиллари, шунингдек рақамли криминалистика, киберхавфсизлик ва криптоактивлар таҳлили соҳасидаги етакчи экспертлар ҳамда компаниялар иштирок этиши режалаштирилган.
Форум дастури ялпи мажлис ҳамда юридик фан ва таълимга инновацияларни жорий этиш, киберҳуқуқ, рақамли криминалистика ва сунъий интеллектни ривожлантириш, кибержиноятларни тергов қилишнинг замонавий усуллари, рақамли далиллар билан ишлаш, шунингдек сунъий интеллектни жиноят суд ишларини юритишда қўллашнинг ҳуқуқий, этик ва процессуал жиҳатларига бағишланган қатор параллель сессияларни ўз ичига олади.
IRZ кўмагида ўтказиладиган махсус сессия рақамли далиллар ва криптоактивлар, шунингдек активларни қайтариш бўйича халқаро ҳамкорлик соҳасида Германия тажрибасига бағишланади.
Форум гибрид шаклда, ўзбек, инглиз ва рус тилларида ўтказилади. Тадбир якунлари бўйича илмий мақолалар тўпламини нашр этиш режалаштирилган.
Оммавий ахборот воситалари вакилларини мазкур тадбирда иштирок этишга таклиф этамиз. Иштирок этиш учун қуйидаги ҳавола орқали рўйхатдан ўтиш мумкин.