Ўзбекистон Республикаси Президенти раислигида жорий йилнинг 27 январь куни ўтказилган видеоселектор йиғилишида белгиланган, хусусан тергов сифатини тубдан ошириш ва унинг шаффофлигини таъминлашга қаратилган вазифалар ижроси доирасида Ҳуқуқни муҳофаза қилиш академияси томонидан тизимли чора-тадбирлар амалга оширилмоқда.
Мазкур йўналишда Академия ходимлари томонидан Навоий вилояти прокуратура органлари ҳамда ички ишлар органлари терговчилари иштирокида ўқув-амалий семинар ташкил этилди.
Семинарда ахборот технологиялари ёрдамида содир этилаётган жиноятларни аниқлаш ва тергов қилиш, кибержиноятларни фош этишда тезкор маълумот алмашинувини таъминлаш, рақамли муҳитда далиллар занжирини бузмасдан маълумотларни тўплаш ва расмийлаштириш масалаларига алоҳида эътибор қаратилди.
Шунингдек, электрон қурилмалар, онлайн платформалар ва рақамли излар билан ишлашда эътибор қаратилиши лозим бўлган муҳим процессуал ва криминалистик жиҳатлар муҳокама қилинди.
Машғулотлар давомида иштирокчилар амалий фаолиятда юзага келаётган долзарб масалалар юзасидан фикр алмашиб, тергов ҳаракатларини сифатли ташкил этиш, рақамли далиллар билан ишлаш ва кибержиноятларни самарали фош этиш бўйича амалий тавсияларга эга бўлдилар.
Мазкур семинар тергов фаолиятида замонавий рақамли таҳдидларга мос ёндашувларни шакллантириш, терговчиларнинг касбий кўникмаларини мустаҳкамлаш ҳамда тергов сифатини оширишга хизмат қилади.