Ўзбекистон Республикаси Ҳуқуқни муҳофаза қилиш академияси АҚШнинг Ўзбекистондаги элчихонаси билан ҳамкорликда прокуратура, божхона органлари ҳамда Маданий мерос агентлиги ходимлари учун “Маданий мерос объектлари ва коллекцияларини муҳофаза қилишни кучайтириш” мавзусида семинар-тренинг ташкил этди.
Уч кун давом этган тренинг ARGUS Cultural Property Consultants халқаро экспертлари иштирокида ўтказилиб, маданий мерос объектлари ва коллекцияларини муҳофаза қилиш, йўқолган ва ўғирланган маданий бойликларни қидириш, аниқлаш ва қайтариш, шунингдек, мазкур йўналишда халқаро ҳамкорликни ривожлантириш масалаларига бағишланди.
Тренинг доирасида иштирокчилар миллий ва халқаро стандартлар, АҚШ қонунчилигининг асосий жиҳатлари, фавқулодда вазиятларда ҳаракатланиш алгоритмлари, маданий мулкка оид жиноятлар бўйича ҳодиса жойини кўздан кечириш, музейлар хавфсизлигини таъминлаш ҳамда етказилган зарарни баҳолаш бўйича амалий кўникмаларга эга бўлдилар.
Шунингдек, маданий бойликлар ўғирланишининг олдини олиш, эҳтимолий хавфларга тайёргарлик кўриш, таҳдид сценарийларига тезкор ва самарали жавоб қайтариш, амалдаги сиёсат ва протоколларни такомиллаштириш масалаларига алоҳида эътибор қаратилди.
Мазкур семинар-тренинг иштирокчиларнинг маданий мерос объектлари ва коллекцияларини муҳофаза қилиш, йўқолган ёки ўғирланган маданий мулкни аниқлаш, қидириб топиш ва қайтариш соҳасидаги билим ва касбий компетенцияларини янада оширишга хизмат қилди.
Семинар якунида иштирокчиларга сертификатлар топширилди.