Ўзбекистон Республикаси Ҳуқуқни муҳофаза қилиш академиясида прокуратура органлари амалиётига интеграция қилинган ўқув жараёни доирасида Ихтисослаштирилган прокурорлар корпусининг туман (шаҳар) прокурорлари ва уларга тенглаштирилган прокурорлар ёрдамчилари, шунингдек вилоят прокуратуралари маҳкама ходимлари учун навбатдаги малака ошириш курси якунланди.
«Судларда давлатнинг қонун билан қўриқланадиган манфаатларини ҳимоя қилиш мақсадида давлат мулкига етказилган зарар, давлат бюджетидан ундирувлар билан боғлиқ низоларни ҳал қилишда прокурор иштирокининг самарадорлигини ошириш» мавзусига бағишланган курс давомида фуқаролик ишлари бўйича судларда давлат манфаатларини ҳимоя қилишнинг долзарб масалалари муҳокама қилинди.
Ўқув машғулотларида давлат мулки билан боғлиқ низолар кўрилишида прокурор иштирокининг самарали механизмлари, суд амалиётида учраётган муаммолар таҳлили, қонунбузилиш ҳолатларини бартараф этишда идоралараро ҳамкорликни мустаҳкамлаш, суд қарорлари ижросини таъминлаш механизмлари ҳамда ҳуқуқни қўллаш амалиётида ягона ёндашувларни шакллантириш масалалари атрофлича кўриб чиқилди.
Курс доирасида соҳанинг масъул ходимлари иштирокида суд амалиётида кузатилаётган муаммолар таҳлил қилиниб, уларни ҳал этиш бўйича амалий тавсиялар ишлаб чиқилди. Шунингдек, ҳудудларда тўпланган ижобий тажрибалар муҳокама қилиниб, иштирокчиларга амалиётга йўналтирилган тушунтиришлар берилди.
Курс якунида тингловчиларнинг билим ва амалий кўникмалари баҳоланди, шу жумладан улар томонидан амалиётдаги муаммолар таҳлили асосида қонунчиликни такомиллаштиришга қаратилган таклифлар кўриб чиқилди.